Maite Peña Gizarte Politikako diputatuak Gipuzkoako Batzar Nagusiko Plenoan azaldutakoaren arabera, asteartean Hernaniko gasolindegi batean aurkitutako hiru gazte etorkinak osasun egoera onean daude, eta «hori da inportanteena. Bik jaso dute alta; hirugarrena, aldiz, Donostia ospitaleko larrialdietako zaintza zerbitzuan dago, baina osasun egoera onean». Gehitu du Aldundia prest dagoela laguntzeko bitartekoak jartzeko.
Irakeko Kurdistangoak
Astearte iluntzean aurkitu zituzten hiru gazteak Hernaniko gasolindegi batean zegoen kamioi baten barruan. Hozkailu motako kamioia zen, Belgikatik Madrilera zijoana. Ertzaintzak emandako xehetasunen arabera, «hiru gazteek nazionalitate irakiarra dute, eta Kirkuk hiritik datoz, Kurdistan irakiarretik. Beren jatorria utzi dute Estatu Islamikoren beldurrez». 19, 19 eta 26 urte dituzte, eta bidaian ezagutu zuten elkar. «Delituzko organizazio bat kontratatu zuten, etapa desberdinetan banatutako bidaia batean Erresuma Batura iristeko. Han ezagunak dituztela azaldu dute».
Polizia nazionalaren esku
Ospitaleko alta jaso duten bi gazteak polizia nazionalaren atzerritarren sailaren esku geratu dira, «egoerak eskatzen dituen tramiteak egiteko». Hirugarren gazteak ospitalean jarraitzen du.
Kamioi gidaria, berriz, aske geratu da deklaratu ondoren, etorkinen bidaiarekin zerikusirik izan ez duelakoan.