Goierriko 22 herrietan herri kontsulta egin nahi dute datorren urte hasieran, eta Hernanin ere bada antzeko asmorik, datorren urte bukaera alderako.
Hori horrela, solasaldia izango da gaur, 19:00etan Biterin, Gure Esku Dago ekimeneko bozeramaile Anjel Oiarbiderekin. Asmoa da kontsulta horiei buruzko xehetasunak ematea, eta Eskozia edota Kataluniako prozesuetatik zer ikasi dezakegun aztertzea. Herritar guztiak gonbidatu dituzte parte hartzera.
«Pausoak ematen hasi gara»
Oiarbideren hitzetan, «pasa den ekaineko hautetsontziak ez genituen eraiki dekoraziorako. Erabakien aroa ireki da, eta herritarrak dira protagonista. Pausoak ematen hasi gara, eta adostasunak bilatu behar ditugu orain. Herritarrek hitza eta erabakiak hartu behar dituzte».
«Asmoa da hitza hartzea, eta erabakitzea; espektadore izatetik protagonista izateko pausoak ematea»
Horrexegatik, herri kontsultak jarri nahi dira martxan, baina Oiarbidek nabarmendu du «hau bide bat» dela, eta ez bakarra. «Asmoa da hitza hartzea, eta erabakitzea. Goierrin bezala, Ispaster eta Dima ere martxan daude. Espektadore izatetik protagonista izateko pausoak eman behar dira, eta bata bestearen laguntzarekin, hau olatu bat izango da».
Adibideak, ikasteko
Katalunia eta Eskoziako ereduak buruan, Oiarbidek uste du «adibide guztiak ikasteko onak» direla. «Kataluniak erakutsi digu batzeak ze gaitasun ematen digun herritarroi, eragiteko. Egungo politikoak berdinak dira, baina jarrera aldatu dute, herriak ere aldatu egin duelako. Gure esku dago gure ordezkari politikoek zein bide hartzen duten».
Eskoziatik ere bada zer ikasi, Oiarbideren ustetan. «Eskoziak erakutsi digu erabakitzeko eskubidea ez dela aldarrikapen abertzale bat, baizik eta demokrazia bateko eskubide bat».
Hori guztia barneratzeko, pausoak eman behar direla uste du Oiarbidek, «eta horretan ari gara».