Sagarra eta sagardoa protagonistak izan ziren igandean Astigarragan. Urtero bezala, sagarraren azoka, sagardo dastaketa eta 2015 uztako lehen muztioaren elaborazioa izan ziren Foru plazan. Tolarean bertan muztioaren elaborazio prozesua ere erakutsi zen: kirikoketa, pisoiekin sagarra jotzea, txalaparta eta ekoiztutako muztioaren dastaketa.
Harrera ona, ekintzek
Antolatzaileek azaldu dutenez, oso harrera ona izan dute antolatutako beste jarduera guztiek ere. Aurten ere, astigartarrek sukaldaritzako dohainak erakutsi dituzte sagarrekin egindako postre lehiaketan eta denera 2 sari banatu dira: Francisca Borreguero izan da irabazlea eta Jon Zamakola bigarrena.
Bestalde, 20 partehartzailek Sagar Uzta jaiko momenturik garrantzitsuenen argazkiak atera dituzte VIII. Argazki Rally Digitalean parte hartuz eta urriaren 16an argazki bilduma onenen 2 sari banatuko dira Sagardoetxean.
Horrez gain, bigarren Sagardobide Erronka jokatu zen eta lehia gogorraren ostean, Astarbe sagardotegiak irabazi zuen.
Astigarteko kideak ere, Sagar Uzta girotzen
Astigarteko kideek ere parte hartu zuten Sagar Uztan. Bi zuhaitz egin zituzten (alambrezko sarearekin, zelofanarekin eta poliuretanozko espumarekin) eta espumarekin berarekin eta brida batzuekin sagar batzuk sortu zituzten, ume bakoitzak berea margotu zezan. Frontoian jarri zuten gunea, Astigarte, zatoz eta margo ezazu zure uzta lemarekin. Ume pila gerturatu zen eta sagarrak margotzeaz aparte, bestelako materiala jarri zuten marrazkiak egiteko etabar.