Denboraldia hastera doan honetan, taldea zer moduz ikusten duten azaldu diote Kronikari Andrea Isasa eta Amaia Irastorza kapitainek eta Andoni Loran entrenatzaileak: «Aurredenboraldi ona egin dugu. Eta taldea motibazioarekin dago; beste urteetan baino gehiago». Zubipe ez edukitzeak min asko egin diela gaineratu du Loranek: «Asko eskertzen dugu beste zelaiak utzi izana, baina moldatu egin behar zara libre dauden ordutegietara, kotxean desplazatu… eta horrek asko eragin du». Hala ere, orain prest dute etxeko zelaia eta oso pozik dira. «Primeran geratu da. Hori bai, ea zenbat irauten duen uholderik izan gabe…».
Gaur hasiko du denboraldia Nesken Euskal Ligako taldeak. Gasteizko Neskak taldea izango dute aurkari, Zubipen. Arratsaldeko 15:30etatik aurrera jokatuko dute. Hernaniko neskak, bigarren urtez ariko dira maila honetan.
Blokea mantendu
Iazko taldea orokorrean mantendu egin da eta hori nabarituko dela uste dute denboraldi honetan. Lauk utzi dute eta iaz kadete eta jubenil mailetan ibilitako batzuk igo dira. «Behekoak gainera oso politak datoz. Kalitatea dute eta esperientzia da lortu behar dutena. Talde gaztea gara, baina gogo asko dugu eta hori nabaritzen da». Gazteak izan arren, iazko esperientzia ere baliagarria egingo zaie: «Urtebete egin dugu kategoria honetan eta ikusi dugu nola funtzionatzen duen. Aurten kolpe gutxiago jasotzea espero dugu. Teknikoki askotan hobeak gara, baina beraien esperientziagatik edo maliziagatik galtzen dugu».
Taldea oso gaztea da dudarik gabe. Zaharrenak 22 urte ditu, gazteenak 15, eta gehienak 16-18 urte bitartekoak dira. Gainerako taldeetan berriz, askoz zaharragoak direla diote: «Amak eta guzti daude».
Ahalik eta azkarren salbatzea helburu
Denboraldiari begira, ahalik eta azkarren salbatzea lortu nahi dute, mailari eustea. «Iaz ere helburu bera jarri genuen, baina azkenean 3 jardunaldiren faltan salbatu ginen. Aurten lasaiago ibiltzea espero dugu. Eta hortik aurrera, ahal bada, zerbait gehiago lortu».
«Hiru eremuetan oso jende ona dugu. Eta puntu potentea da, gogo haundia dugula»
Azken momentuan galdu
Taldearen hutsuneak edo ahulguneak indartzen ere saiatu dira. «Gure hutsunea izaten zen azken momentuan galtzen genituela partiduak. Dominatzen hasten ginen eta irabazten askotan, baina gero lasaitu, eta aurkariak irabazten hasten zirenean, etsi egiten genuen. Taldeak horri garrantzia eman dio eta jendeak orain buruan du azken momentura arte borrokatu behar dugula; ez dugula aurrez galdutzat eman behar».
Indarguneak ere aipatu dituzte: «Hiru eremuetan oso jende ona dugu. Atzean segurtasuna ematen dute, bai atezainek bai defentsek, erdian teknikoki oso onak dira eta goran denetarik dugu: jende azkarra, gola daukana, ondo moldatzen dena baloiarekin… Eta puntu potentea da, gogo haundia dugula».
Partidu zaila eta ikusgarria, gaurkoa
Gasteiztarren aurkako partidua zaila izango dela aurreratu dute: «Laugarren bukatu zuten iaz eta partidu exijentea izango da. Baina Zubipera bueltatu gara eta mina egingo dugula argi dugu. Iaz beraien aurka jokatu genuen etxeko partidua 3-0 irabazi genuen. Oso partidu polita izango da jokatzeko, eta ikusteko».
Herritarrei deia Zubipera jaisteko
Herritarrei dei egiten diete partidua ikustera jaisteko: «Oso polita da herriko jendearen babesa izatea. Asko nabaritzen da. Gainera, lehenengo partidua izango da eta ondo hasi behar dugu. Probatu dezatela behintzat zer den nesken partidu bat ikustea. Permanentzia jokoan genuenean, grada bete zen. Hori nahi dugu beti. Izan ere, beti dago zerbait jokoan. Partiduro, denboraldia dago jokoan».
Berdintasunaren aldeko komisioa
Zuzendaritza aldatzearekin batera, hainbat aldaketa ere egin direla nabarmendu dute, berdintasunaren alde. «Desberdintasun haundiak zeudela ikusten genuen bi talde nagusien artean eta zuzendaritza berriari aldaketa batzuk egiteko proposatu genion. Berdintasunaren aldeko komisioa sortu da eta pauso batzuk eman dira», diote Isasak eta Irastorzak. Eta Loranek berriz: «Ez dira konturatzen zer egin duten. Sekulako lana egiten ari dira eta krixtona lortu dute».
Orain, nesken partiduak aurretik
Aldaketa horietako bat, nesken partiduak mutilenen aurretik jartzea izan da. Orain arte, Ohorezko Erregionalen partidua 16:00etan izaten zen eta 18:30etan neskena. Denboraldi honetan, neskek 15:30etan jokatuko dute eta 18:00etan mutilek. «Zaletuek nesken partidua ere ikustea lortu nahi da eta sarrera bat ere jarriko da bi partiduak ikusteko aukera emango duena. Ez dakigu helburua lortuko den, baina klubak saiakera egitea behintzat oso positiboa da».