Haurdunaldia bizitzea eta partekatzea lantzen dituen tailerra antolatu du Udaleko Berdintasun Kontseiluak. Haurdunaldian zehar ohikoak izaten dira azterketa ginekologikoak eta probak, haurdun dagoen emakumearen kontrola eramateko eta arazorik sortzen bada, aurre egiteko. Berdintasun Sailetik ordea, gogoratu nahi dute, haurdun egotea ez dela gaixo egotea.
Helburua, haurdunaldian sortzen diren galderei erantzutea
Zer gertatzen da haurdunaldian zehar izaten diren sentsazio emozional eta fisikoekin? Asko izaten dira amak izaten dituen galderak: zer gertatzen da ama eta umearen arteko harreman diadikoarekin? Zer gertatzen da familia-guneko beste kideen harremanarekin? Zein da bikotearen egitekoa?
Antolatzaileek azaldu duten moduan, amak sentitu egiten du, eta umeak ere, eta hori nabaritu egiten da maila fisikoan, tentsio muskularrean eta maila emozionalean. Galdera guzti horiei erantzute aldera antolatu dute haurdunaldi tailerra. Horrez gain, tailerrean emango dute, baita ere: haurdunaldiaren eta erditzearen anatomiari buruzko informazioa; haurdunaldi faseei eta umekiaren garapenari buruzko informazioa; izaten diren molestiak nola arindu azalduko dute; emakume eta bikotearen beharrak zeintzuk diren errekonozitu eta adierazten hastea; haurdunaldi eta erditze prozesuaren hausnarketa; eta umearekiko loturari buruzko informazioa.
Tailerra, urritik urtarrilera
Josune Martirena psikologoa eta Marijo Artola diafreo terapeuta izango dira tailerraren zuzendari eta koordinatzailea.
Tailerra urriaren 7an hasiko da, eta urtarrilaren 27an bukatu. Saioak asteazkenetan izango dira, 18:00etatik 20:00etara, Biteri kultur etxean.
Parte hartu nahi duten emakumeek, gutxienez, 12 asteko egon behar dute haurdun. Saio batzuetan bakarrik hartuko dute parte; eta besteetan, hauen bikote edo laguntzaileek; eta azkenik, beste batzuetan, guztiek elkarrekin. Izen ematea zabalik dago, eta prezioa 30 eurokoa da. Kontakturako: marijo-m@hernani.eus; maialen-a@hernani.eus, 943 33 70 17 edo Plaza Feminista (Aristizabal 7, behea).