Hernani Erabaki egitasmoa aurrera dijoa. Ekainean jarri zen martxan, herritarren partehartzearekin. Udan berriz, ekainetik irailera, bigarren fasea garatu dute Udaleko teknikari, zinegotzi eta langileek; hau da, balorazio teknikoa eta ekonomikoak egin dira. Hala, hasiera batean jaso ziren 136 proposamenetatik 60 inguruk egin dute aurrera. Hain zuzen, proposamen hauek dira orain izaten ari diren saioetan lantzen ari direnak.
Bi galdera, proposamenei
Iraileko saioetan erabakiko da hernaniarrei 60 proposamen horietatik zeintzuk iruditzen zaizkien garrantzitsuenak. Proposamen bakoitzari bi galdera egingo dizkiete: Honek eguneroko bizitza errazteko balioko al du? Kostua eta ekarriko duen onura orekatuak al dira? Balorazio onena jasotzen duten 30 proposamenak iritsiko dira hautaketa fasera.
Hiru saio, irailean
Irailean zehar hiru saio egingo dituzte. Atzo egin zuten aurrenekoa; gaur bigarrena izango da, 18:00etan, Plaza Feministan. Eta astelehenean azkena, 19:00etan, Gabriel Zelaian.