Asteleheneko kirol eta partehartze batzordeari erreferentzia eginez, halaxe azaldu du Gobernu Taldeak prentsa ohar bidez: «Gai nagusia atez atekoa kentzeko herri kontsulta izan da. Eztabaida gehien eragin duen puntua izan da, zehazki zein izango den kontsultan herritarrek erantzun behar izango duten galdera. Horretaz gain, oposizioko EHBildu eta PSEko kideek jakin nahi izan dute udal gobernuak zein hiri hondakin bilketa sistemaren alde egiten duen».
Eta horri erantzunez, adierazi du Udal gobernuak Astigarragarako nahiko lukeen gaikako bilketa sistema, zaborra edukiontzi bidez jasotzen duena dela, «materia organikoa jasotzeko bosgarren edukiontzia jarriz. Ildo horretatik, gobernu jeltzaleak San Markos Mankomunitateari bostgarren edukiontzia jartzearen inguruan txosten tekniko-ekonomikoa eskatua dio», gaineratu du.
Hauteskunde-programan jasota daukaten legez, herritarrei atez atekoaz erabakitzeko aukera emango dien galdeketa egitea ezinbestekoa deritzote. «Hortaz, galderak atez atekoa bai ala ez erabakitzeko behar du izan, atez atekoa kentzearen alde bozkatzeak edukiontzi sistemaren alde egitea esan nahi baitu», azaldu dute.
Gobernu taldeak positibotzat jo ditu asteleheneko partehartze batzordean mahaigaineratutako iritzi ezberdinak eta aurreratu du, aurki bilera irekira deituko dituela astigartarrak.