Ondo hastea zuen erronka Hernanik, eta etxeko partiduak irabaztea. Oraingoz biak lortu dituzte, atzo Gernikari 42(b)-20 irabazita.
Markagailuak adierazten duena baino partidu estuagoa izan zen. Partidua hastearekin batera, Gernika aurretik jarri zen entsaio eta transformazio bati eskerrak. Berehala erantzun zuten, ordea, trikoloreek eta aurretik jarri ziren Otxotorena eta Lucasen entsaioak tarteko. Eta berriz aurrea hartu, Gernikak. Lehenengo zatia halaxe joan zen eta atsedenaldira 18-17 iritsi ziren.
Bigarren zatia hasi eta segituan, bizkaitarrak aurretik jarri ziren berriz, 18-20, baina handik aurrera hernaniarrak izan ziren nagusi, nahiz eta azken momentura arte sufritu. Azken hamar minutuetan egindako bi entsaioekin lortu zuten errenta. Denera, bost entsaio egin zituen Hernanik eta bonusa ere lortu zuen.
Aitor Lucasek bi entsaio
Aitor Lucasek eta Anartz Elosegik atzo debutatu zuten eta beraien lana azpimarratzekoa izan zela azaldu dute taldetik. Lucasek partidu osoa jokatu zuen eta bi entsaio egin zituen. Elosegi berriz, Pello Perez ordezkatuz atera zen lehenengo zatiaren bukaeran. Oso postu zailean, apertura bezala jokatu zuela eta oso ondo aritu zela gaineratu dute: «Oso jende gaztearekin hasi gara eta ondo erantzun dute». Igor Genua ere fin ibili zen hankarekin.