«Erronka da iaz baino hobeto hastea, eta horretarako, etxeko partiduak irabazi behar ditugu. Gure arma onena da Landare, etxekoak dira klabea», diote Ugaitz Otañok eta Igor Genuak, Hernani errugbi taldeko bi jokalari beteranok. Eta erronka betetzeko, estreinako partiduan bertan daukate aukera ederra.
Gaur hasiko dute denboraldi berria, Ohorezko Mailan laugarrena segidan, eta etxeko berotasunean estreinatuko dira hirukoloreak. Gernikaren kontra ariko dira, 17:00etan Landaren: «bost puntuak lortzea espero dugu. Aurten lehenago hasi gara entrenatzen, aurreneko partiduetara ondo iristeko».
Hasteko, baja garrantzitsuak
Prestaketa goiz hasita ere, zailtasunak ere izango dituzte hirukoloreek: «baja garrantzitsuak izan ditugu, eta esperientzia haundiko titularrak dauzkagu lesionatuta: Iraitz Garmendia eta Igor Etxeberria. Baina jende gaztea sartu da, eta ari dira erritmoa eta konfiantza hartzen. Pisu askorik ez daukagunez, joku azkarra eta dinamikoa egin behar dugu, eta talde guztiak ikasi behar du».
Ikasketa prozesu hori somatu dute lagunarteko partiduetan ere: «aurrenekoan oso galduta ibili ginen; bigarrenean hobeto, gauza politak egiten, nahi dugun jokua».
Joku sistema originalera buelta
Joku aldaketarekin, hobeto aritzea espero dute hirukoloreek: «iaz sistema berezi batekin hasi ginen, eta gehiegi izan zen guretzat, ez genuen asmatu. Horregatik, gure joku originalera bueltatu ginen bigarren itzulian, eta ondo atera zitzaigun. Horrekin segiko dugu aurten».
«Gero eta zailagoa dago liga»
Urtero bezala, mailari eustea izango du helburu Hernanik, «ahal bada gutxiago sufrituta. Baina ez dugu uste lasaiago ibiliko garenik. Oso talde gaztea daukagu guk, eta gero eta zailagoa dago liga. Beste taldeek gero eta gehiago eta hobeto fitxatzen dute. Urtero daude aurpegi berriak, talde guztietan. Gurean ere bai, baina samoarrik edo Fijikorik ez duzu topatuko...».
Gernikak berak, esaterako, 6-7 jokalari berri izango ditu: «ondo datorkigu orain jokatzea beraiekin, talde bezala osatu gabe daudelako oraindik. Baina indibidualki hobeak dira».
Horren aurrean, taldea izango du puntu fuertea Hernanik, «denak zentzu berdinean lehiatzea».
OHOREZKO MAILAKO TALDEA - 2015/2016 DENBORALDIA
1go lerroa: Jon Insausti, Beñat Iradi, Lander Meaza, Eneko Noriega, Ugaitz Otaño eta Iñaki Otxotorena.
2garren lerroa: Patxi Agirrezabala eta Jon Otxotorena.
3garren lerroa: Ander Gutierrez, Mikel Otxotorena, David Pelaz, Mikel Perez eta Iker Sevillano.
Atzeko lerroetan, giltzarriak: Mattin Collado, Iraitz Garmendia, Igor Genua, Ander Larretxea, Pello Perez eta Jon Zumalabe.
Hegalak, erdilariak eta atzelariak: Tomax Elorza, Igor Etxeberria, Oier Garmendia, Iñaki Leonet, Mattin Mujika, Jon Ander Puertas eta Jokin Uzkudun.
Harrobitik etorriak: Anartz Elosegi (erdilaria), Axier Lopez (erdilaria), Aitor Lukas (hegala), Haritz Muñoa (1go lerroa) eta Beñat Zinkunegi (3. lerroa).
Taldera itzulitakoak: Jokin Esnal (erdilaria) eta Tony Jones (erdilaria).
*Entrenatzaileak: Jon Insausti, Jon Iraola eta Patrick Polidori.