Mugikortasun Astearen barruan, bi ekintza izango dira asteburu honetan. Gaur, patinetan ibilaldia antolatu dute. Karabelen jarri dute hitzordua 09:30etan. Gainera, Karabelen bertan eta Zubiondo poligonoan ginkanak jarriko dira.
Bihar berriz, Bizikleta Festa izango da, jende gehien bildu ohi duen ekintza, hain zuzen. Kasu honetan ere, 09:30etan jarri dute hitzordua, Plaza Berrin.
Ttapa-ttapa ekimena, asteazkenetik aurrera
Asteazkenean bueltan izango da Ttapa-ttapa, Denok batean ekimena, osasuna zainduz ondo pasatzeko ibilbideekin. Lehengo ikasturtean bezala, 11:00etan Atsegindegitik abiatuko dira eta bukaeran, hamaiketako berezia egongo da bertaratutako guztientzat. Helburua da adineko pertsonak kalera ateratzea: ibilbideetan zehar ariketa fisikoa egiteko eta adin bereko pertsonekin sozializatzeko aukera izango dute. Abenduaren 16ra arte, asteazkenero izango du aukera nahi duenak parte hartzeko.
Lehenengo saioa, Mugikortasun Astearen barruan izango da.