Aranoko inguruak ezagutzeko asmoz, Mendaratzera jaisteko zita jarri dute gaur. Herrigintza Eskola berri bat eginen dute, udako oporraldia igarota aurrenekoa. Bertaratzen direnek, goiz pasa ederra egiteko aukera izanen dute, elkarrekin bazkalduta eta Urumeako espezie bitxienak ezagututa.
Kaxetan jarri dute elkartzeko zita, goizeko 10:30etan, eta elkarrekin jaitsiko dira Mendaratzera. Nabarmendu dute, gazteek eta familia osoak gozatzeko ibilaldi erraza izanen dela.
Goiza ondo hasteko, hamaiketakoa
Paseoa bukatuta, eta Urumea ibaiaren ertzera jaitsita, hamaiketakoa eginen dute Mendaratzen bertan, 11:00etan.
Eta jarraian, Urumea ibaiko espeziak ezagutuko dituzte bertaratuek, Iñaki Sanz-Azkue Aranzadiko biologoaren erakusketarekin. Bertan egongo da biologoa bera: «14 argazkiko erakusketa izanen da, eta bertan bildu ditut Urumea ibaiko zenbait landare eta animalia bereziren argazkiak», azaldu du.
10:30etan jarri dute elkartzeko zita, Kaxetan, eta bertatik, elkarrekin jaitsiko dira Mendaratzera.
«Zaila da espezie hauek beste lekuetan aurkitzea»
Biologoak nabarmendu du, gainera, espezie horietako animalia eta landareak ez daudela toki askotan: «mehatxatuta dauden espezieak dira, eta guk Urumea ibaian bertan aurkitu ditzakegunak. Beste lekuetan, zaila da espezie hauek aurkitzea. Oso landare eta animalia bereziak dira, bitxiak».
Argazkiak ikusi bitartean, azalpenak ere emango dizkie haurrei, «modu sinple batean, espezie horiei buruzko kuriosidadeak azalduz, besteak beste». Bildutako informazioa, eskolan erabiliko dute gero.
Baina gurasoek ere izanen dute aukera, edozein galdera egiteko, espezieren bati buruz ezer gehiago jakin nahi badute.
Bazkaria, norberak eramanda
Ondoren, 13:00ak aldera, elkarrekin bazkalduko dute gelditu nahi dutenek, bakoitzak etxetik eramandakoarekin.
Eguraldi txarra egiten badu, San Roke elkartean emanen dute Herrigintza Eskola.