Hernaniko zazpi hezkuntza zentroetan, dagoeneko hasi da ikasturte berria. Hernaniko Oinarrizko Lanbide Heziketako ikastetxean, Transpacarren (lehen CIP zen, baina LOMCErekin aldatu egin da), atzo eman zioten hasiera. Bertan izan ziren Estibalitz Aldeiturriaga eta Xabier Lertxundi zinegotziak, ikasle eta irakasleekin batera.
Ibilgailuen konponketarako langile prestakuntza irakasten da Transpacarren eta 16-18 urte bitarteko 31 ikasle daude, bi kurtsotan banatuta. Lasarte, Aia, Tolosa, Alegia, Andoain, Ibarra Urnieta, Donostia, Zarautz, Orio eta Bidanikoak dira.
Ikasketak, herrian
Ikasketa hauek, graduatua lortzeko ohiko bidearen alternatiba dira; eta horrez gain, ibilgailuen konponketan oinarrizko ezagutzak eskuratzen dituzte. 27 urte dira proiektu hau martxan dagoela eta egiten den lana eta lortzen diren emaitzak ikusiz, Hernaniko Udaleko Hezkuntza Sailak datozen urteetan ere hezkuntza zentro honen eskaintza Hernanin mantentzearen aldeko apustua egingo du, ikasketa hauek herrian egingo direla bermatuz. Hernaniko Udaleko Hezkuntza Sailaren helburua da, «hernaniarrek ikasketak herrian bertan egiteko aukera izatea».