Bertsotik bertsora igaroko dira datozen lau hilabeteak. Igande honetan hasiko da Gipuzkoako Bertsolari Txapelketa Nagusia, Beasaingo Usurbe antzokian, eta ordutik, ia astebururo izango dira saioak, abenduaren 20ko finalera arte.
Eta saioak bezala, ez dira faltako txapela jantzi nahi duten buruak ere. 43 bertsolari ariko dira, tartean Hernaniko bertso eskolako sei: Eli Pagola, Unai Agirre, Agin Laburu, Jexux Mari Irazu, Unai Gaztelumendi eta Beñat Gaztelumendi.
Eli Pagola, estreinako saioan
Igandeko saioan bertan hasiko du bere ibilbidea Eli Pagola ereñotzuarrak. Final zortzirena izango du Beasainen, arratsaldeko 17:30etan, bere aurreneko Gipuzkoako Txapelketan.
Final zortzirenetan hasiko da lehiatzen, baita ere, Unai Gaztelumendi añorgarra. Andoainen ariko da, urriaren 11n.
Beste laurak, berriz, final laurdenetan sartuko dira: Agin Laburu eta Jexux Mari Irazu, urriaren 24an Urretxun; Beñat Gaztelumendi, urriaren 25ean Errenterian; eta Unai Agirre, azaroaren 8an Eskoriatzan.
Sarrerak salgai, interneten
Saio guztietarako sarrerak (Ilunbeko finala izan ezik), dagoeneko salgai daude interneten: bertsosarrerak.eus. Saio guztiak ikusteko bonua ere erosi daiteke bertan.
Hernanin ez da bertso saiorik izango, Gipuzkoako Txapelketa honetan.