Denboraldia hastear denean, 50garren urteurreneko azken ospakizunak aurkeztu ditu Hernani Errugbi Elkarteak: hiru hitzaldi, taldeen aurkezpen ofiziala, eta Bartzelonarekin topaketak.
Aste honetan bertan izango dira aurreneko biak. Bihartik asteazkenera, hiru hitzaldi eskainiko dituzte Biterin, doan: «heziketa fisikoa eta elikadura oso garrantzitsuak dira errugbia praktikatzeko orduan, eta horri buruz izango dira aurreneko biak». Taldearen historiaz ere ariko dira, asteazkenean, eta bertan izango dira 1965etik Hernanitik pasa diren entrenatzaile guztiak.
Gainera, 50 urteen liburu bat argitaratzeko asmoa dauka elkarteak: «San Joan konpartsaren txostenetik abiatuta, eta Iñigo Goñiren kolaborazioarekin, taldearen historiari buruzko liburua publikatzen saiatuko gara».
Aurkezpen ofiziala, ostiralean
Ostiralean izango da taldearen aurkezpen ofiziala, Tilosetan, eta 50garren urteurrena denez, talde guztiak aurkeztuko dituzte. Ekipazio berriarekin desfilatu, eta familiako argazkia ere egingo dute, entrenatzaile eta jokalari guztiekin. Pintxoak eta garagardoa ere izango dira bertan.
Bartzelonarekin topaketak, «azken txupinazoa»
Urriaren 3 eta 4ko asteburuan bukatuko dituzte urteurreneko ospakizunak: «azken txupinazoa izango da, eta izugarrizko jardunaldia montatuko dugu». Igandean izango da Hernani eta Bartzelonaren partidu ofiziala, baina larunbatean, topaketa-torneoa jokatuko dute 10, 12, 14, 16 eta 18 urtez azpiko taldeek. Afaltzen ere emango diete denei Landaren, eta ondoren, Hernaniko jokalari bakoitzak Bartzelonako bat hartu beharko du etxean: «aspaldi ez genuen egiten, eta pena da, izugarri sendotzen baitu harremana. Oso egokia da Bartzelonarekin egitea; antzeko filosofia dugu».