Domina lortzea zen helburua, eta zilarrezkoa ekarri dute Hernanira, Amaia Irazustabarrena eta Maider Huitzi palistek, 22 urtez azpiko Mundialetik.
Baina pena pixka bat ere badaukate, urrea hain gertu izan ondoren. Espainiako selekzioarekin, finala jokatu zuten atzo, Mexikoren kontra, eta aurkari gogorregia izan ziren ertamerikarrak.
Finalean atzetik, hasieratik
Irazustabarrenak jokatu zuen finala, Rebeka Contin nafarra lagun, eta 15-8 eta 15-4 galdu zuten: «mexikarrak oso onak dira, eta guri kosta zaigu partiduan sartzea. Gero gerturatu gara, baina akatsak egin ditugu, tantoak bukatu nahi genituelako, eta berriro alde egin digute. Eta bigarren setean, hasieratik hartu dute aldea», azaldu du hernaniarrak.
Edozein kasutan, «oso pozik» daude lortutakoarekin: «semifinala irabazi ondoren, oso gustora ginen dagoeneko lortutakoarekin. Txapelketa ona jokatu dugu denok».