Kattalin Miner hernaniarrak irabazi du aurtengo Igartza Saria, Elkar argitaletxeak, Beasaingo Udalak eta CAF enpresak antolatzen dutena. Idazle gazteei laguntzeko beka bat da, eta 15 idazlek hartu dute parte. Kafe beteak eleberri proiektua aurkeztuta, sari potoloa lortu du Minerrek: 6.000 euro, eta eleberria argitaratzeko konpromisoa. Horrela, bere aurreneko liburua publikatuko du.
Eleberria argitaratzea ere sariaren parte da; Minerren aurreneko liburua izango da Kafe beteak.
Kafe beteak eleberrian, emakume arrakastatsu baten noraeza aurkezten du Minerrek. Honakoa da bere sinopsia: «Jezabelek gora egin du enpresan, espero ez zuen herentzia bat ere jaso du, eta horri esker etxe bat erosi. Lanean nahiz bizitzan, etengabe erabakiak hartzen ohitua dago, eta zirt-zart egin ohi du, zalantza handirik gabe. Hala ere, txikikeria baten aurrean paralizaturik geratuko da halako batean, aurrera egin ezinda...».