Poloniara ere iritsi da Ziraba proiektua. Europako Kongresu Herpetologikoa ari dira ospatzen Wroclawen, astelehenetik bihar arte, eta proiektuaren poster informatiboa jarri dute bertan. Ion Garin Aranzadiko zientzialariarekin hitz egin du Kronikak.
Zein garrantzi dauka kongresuak?
Bertan ematen dituzte argitara bere emaitzak, Europan eta Europatik kanpo anfibio eta narrastiekin lanean dabiltzan zientzialariek. Europa mailan, Munduko Kongresu Herpetologikoaren ostean hitzordu garrantzitsuena da. Guztira 60 bat hitzaldi emango dituzte eta beste 70 bat lan poster bidez argitara emango dira. Kongresuak zure lana argitara emateaz gain, informazio elkartrukaketarako batzarra izaten da, jendea ezagutu eta elkarlanean proiektuak hasteko bidea da.
Nolatan eraman duzue Ziraba proiektuaren posterra bertara?
Adar desberdinak jorratzen zituen proiektua izanda, kongresuan argitara eman nahi izan dugu, gisa honetako lanak ez baitira sarritan azaltzen, eta oso garrantzitsua da proiektu baten emaitzak gizarteratzea. Proiektua guztiz berritzailea izan da; adineko jendearen esanak, ohitura, kondairak edota izenak biltzeaz gain, Txirrita Herri Eskolako umeak ere anfibio eta narrastien munduan barneratu ditugu, egun batzutan bada ere zientzialari senti zitezen.
«Ziraba proiektua guztiz berritzailea da, eta oso garrantzitsua da proiektu baten emaitzak argitara ematea».
Nola izan da bertan egoteko prozesua?
Kongresu hauetan aurkezpen bat egiteko bi bide daude. Hitzaldi batetara gonbidatu zaitzakete, baina kasu horretan bilakaera luzea duten zientzialariak gonbidatzen dituzte. Beste maila batean dauden zientzialariek, gure kasua adibidez, laburpen bat bidali behar izaten dute kongresuaren batzorde zientifikora, eta onartua izaten bada aurkeztu dezakezu. Hori izaten da ohiko bilakaera.
Zergatik da garrantzitsua Ziraba proiektua bertan egotea?
Maila pertsonalean harro sentitzeko modukoa da, maila apalean, Hernani bezalako herri txiki batean, martxan jarri den proiektua Europan zehar ezagutaraztea. Baina gehienbat, proiektua osatzeko eta egindako akatsak konpontzeko balio dezake. Bestalde, gisa honetako batzarretan jendeak egiten dizkizun komentario eta oharrek proiektua aberastu dezake.
Nolakoa da posterra?
Proiektuak dituen adar desberdinak agerian utzi dira bertan. Hezkuntza, sentsibilizazioa, ikerketa, kudeaketa edota kultur ondarearen berreskurapena izan dira proiektuaren funtsa. Jende eta erakunde askoren parte hartzea izan du, eta etorkizunera begira, Euskal Herri mailan beste herri batzuetan zabaltzea dauka helburu. Ikerketaren aldetik Hernaniko bi kidek, Egoitz Alkortak eta Iñaki Sanz-Azkuek, osatutako inbentario herpetologikoaren emaitza orokorrak azaltzen dira bai eta Txirrita Herri Eskola, Hernaniko Kronika eta Dobera Euskara Elkarteak egindako ikerketa eta dibulgazio lanak ere. Poster nahiko bisuala da, informazio gutxirekin.
Kongresuan parte hartzen dutenak, posterraren ondotik pasa eta galderak egiten dizkizute, posterraren nondik norakoa azaldu eta proiektuaren helburu eta emaitzak azaltzeko. Posterrak duen abantaila da kongresu osoan zehar eskegita egoten dela; arazoa, oso leku mugatua izaten dela proiektuaren informazio guztia azaltzeko. Sintesi lan hona egin behar izaten da.