Parte hartze eta Kirol Batzordeak bilera egingo du astelehenean, legegintzaldi berriko aurrenekoa. Eta Gobernu Taldeak jakinarazi du, «atez ateko hondakin bilketa sistema polemikoaren inguruan» ariko direla bertan: «gai nagusia herri galdetegia izango da».
Goizeko 09:00etan bilduko da batzordea, udaletxeko pleno aretoan, eta guztientzat irekia izango da. Hiru puntu landuko dituzte, erregu eta galderez gainera: parte hartze, informazio eta gardentasun ordenantza urratu izanagatik jasotako kexa bat; atez-atekoari buruzko kontsulta; eta kiroldegiko obren bigarren faseari buruz EH Bilduk aurkeztu duen idatzia.
«Atez atekoak eztabaida eta kontrako iritzi asko sorrarazi ditu astigartarren artean»
Atez atekoari buruzko kontsulta izango da gai potoloena: «hiri hondakinak bildu eta tratatzeko udal ordenantza indarrean sartu aurretik eta gaurdaino, atez atekoak astigartarren artean eztabaida eta kontrako iritzi asko sorrarazi ditu», azaldu du Gobernu Taldeak. Gogorarazi du, Astigarraga Garbia plataformak 1.700 firma jaso zituela 2012an atez atekoaren kontra, «orduko biztanleriaren ia erdia».
Horregatik, kontsulta egiteak «lehentasuna dauka» EAJrentzat: «Astigarragako biztanle guztiek atez atekoaren inguruan bere iritzia eman ahal izatea nahi dugu, bere adostasuna edo desadostasuna kontsultaren bidez jakinaraziz».
Herri galdetegiaren bideragarritasuna eztabaidatu, eta egingo den galdera aurkeztu eta proposatuko dute.
Horrela, parte hartze batzordean eztabaidatuko dute Udala osatzen duten alderdi politiko ezberdinek, herri galdetegiaren bideragarritasuna. Modu berean, azaldu dute Gobernu Taldeak kontsultan egingo den galdera aurkeztu eta proposatuko duela.
Saio irekia izanik, nahi duten herritar guztiak bertaratu daitezke bilerara, bere ekarpenak, erreguak edo galderak egiteko gaiaren inguruan.
Bozeramaile Batzordearen bilera, ondoren
Bozeramaile Batzordea ere bilduko da astelehenean, alkatetzan, Kirol eta Parte hartze Batzordea bukatzen denean. Sei puntu landuko dituzte.