Astigarragako udal talde sozialistak eskaera egin zion ostiral goizean udaletxeari Astigarragak ere bat egin dezan aterpe-hiri deituriko sarearekin, errefuxiatuentzako babes tresnak prestatuz. Horrez gain, astigartarrei gonbidapena egiten die inplikatzeko eta kolaboratzeko ahal duten neurrian errefuxiatuei laguntza emanez.
Mikel Duran bozeramaileak azaldu du mozio bat erregistratu duela hurrengo Plenoan eztabaidatu dadin eta udalak neurriak hartu ditzan krisi humanitario honen aurrean. Sozialisten ekimenak hiru puntu ditu, eta Astigarraga aterpe-hiri sarera gehietzea eskatzeaz gain, Eusko Jaurlaritzari dei egiten dio, Eudel eta Gipuzkoako Foru Aldundiarekin elkarlanean, plan bat martxan jartzeko berehala, diligentzia eta zabalkunde haundienarekin Euskadin pertsona hauek hartzeko. Sare hauekin bat egiten duten udalerriei beharrezko babesa eta ez ohiko laguntza ekonomikoak bideratzea ere eskatzen die, emergentziazko egoera honi erantzuteko.
Horrez gain, mozio honen bidez nahi du Astigarragako Udalak Espainiako Gobernuari eskatzea, bere jarrera malgutzeko Europar Batasuneko negoziaketetan, kide den herrialde bakoitzak dagozkion errefuxiatuak hartu ditzan, eta eskuzabaltasunez eta jarrera zekenik gabe jokatu dezan asilo politikoa ematerakoan.
Rajoyren Gobernuari ere eskatzen dio Europar Batasunean babestu dezala politika orokor bat inmigrazioari eta asiloari dagokionez.
Elkartasuna itzultzea
Duranen hitzetan, «elkartasun erantzun hau ez da bakarrik gizatasun eskaera bat, baita milaka euskal herritarrek emigrazioa eta exilio politikoa bizi izan zutenean jaso zuten elkartasuna itzultzea ere».