Mugitzeko hamaika modu ezberdin jarriko dituzte praktikan, datozen egunetan, Mugikortasun Astearen barruan. Atzo aurkeztu zuten, eta irailaren 19tik 25era, astebeteko plana prestatu dute, Hernanin barrena.
Dena den, larunbat honetan bertan izango da aurreneko ekintza, 2garren eskuko bizikleten azoka. Urbieta kalean jarriko dute, 10:00etatik 14:00etara. Nahi duenak eraman dezake berea, 09:00etatik 10:30etara.
Bizikleta festa, «ekintza nagusia»
Hurrengo asteburuan, berriz, patinetan zein bizikletan irteerak egingo dituzte: «bizikleta festa izaten da ekintza nagusia, jende gehien biltzen duena», aipatu du Mertxe Gomez udal teknikariak. Eta oinez ere egingo dute ibilaldia; Ttapa-Ttapa egitasmoaren fase berriko aurreneko paseoa izango da gainera, irailaren 23an.
«Bidegorrien sarea haunditzen jarraituko dugu»
Aurkezpena, Latsunbe eta Urbieta kalea lotzen dituen igogailuaren ondoan egin zuten: «oso garrantzitsua da mugikortasunaren eta irisgarritasunaren ikuspegitik», azaldu zuen Luis Intxauspe alkateak. Eta aurreratu zuen, aurten bidegorri sarea haunditzeko lanak hasiko direla, Etxeberritik Floridara bidean.
Irailak 12, larunbata
2garren eskuko bizikleta azoka: Urbieta kalean, 10:00-14:00.
Irailak 19, larunbata
Patinetan ibilaldia: Karabeletik abiatuta, 09:30etan.
Irailak 20, igandea
Hernanin bizikletaz: Plaza Berritik abiatuta, 09:30etan.
Bide heziketa zirkuitua: Atsegindegi plazan, 09:30-12:00.
Irailak 23, asteazkena
Ttapa-Ttapa, denok batean: goizeko ibilaldia, 10:30etatik 12:00etara, Atsegindegitik abiatuta.
Irailak 25, ostirala
Kirol egokitua (nire lekuan jarri): Atsegindegin, 17:00-19:30.