Giro bikaina eta lehia estua izan ziren atzo Donostian, Kontxako Banderako estropadetan. Nesketan ez zen sorpresa haundirik izan, eta San Juan izan zen aurrena, baina gertutik segika izan zituen Hibaika eta Zumaia.
Mutiletan, berriz, Urdaibak irabazi zuen aurreneko txanda, eta Hondarribiak bigarrena. Ohorezko Txandan lehia estua espero da.
Hiru segunduko tartea, nesken artean
Aurreneko estropada nesken artekoa izan zen. San Juan iritsi zen aurrena, 10:36:36 denbora eginda; marka ederra, kontuan hartuta markarik onena 10:35:62 dela, Zumaiak egina, 2012an.
Atzetik sartu ziren, hurrenez hurren, Hibaika, Zumaia eta Orio; Hibaika 2 segundutara, Zumaia 3ra, eta azkenik, Orio, 13ra.
Espero bezala, San Juan ibili zen finen, baina segundu gutxiko aldea atera zien hurrengo bi ontziei. Datorren igandean erabakiko da, beraz, guztia. Atzokoa errepikatzeko borrokan ariko dira Hernanin bizi den Arantxa Arregi sanjuandarra, eta Amets Zapiain, lehenago Hernanin aritutako astigartarra.
Mutiletan ere, tarte txikia
Bi txandatan aritu ziren mutilak. Aurrenekoan, Urdaibaik irabazi zuen, 19:14ko denborarekin, eta atzetik sartu ziren Orio (19:27), San Pedro (19:49) eta Donostiarra (20:13).
Bigarren txanda, berriz, Hondarribiak irabazi zuen, 19:12ko denborarekin, eta segidan iritsi ziren Tiran, 12 segundura, Kaiku, 16 segundura, eta San Juan, 23ra.
Ohorezko Txandan, beraz, Hondarribia, Urdaibai, Orio eta Kaiku ariko dira. Bi segunduko aldea besterik ez dago aurreneko bien artean, eta bakarrekoa, azken bien artean.