Ez du inor sorpresaz harrapatuko gaur iluntzeko burrunbak, Zikuñaga auzoan. Dagoeneko zikuñatarren ikur bihurtu da danborrada, eta ez du hutsik egingo aurten ere. Auzoko festak, ordea, asteazkenean hasi ziren, eta gaur ere izango dute gozatzeko parada, danbor hotsek auzoa hartu aurretik. Ez dute jaien hasiera iragarriko, beraz; ezta bukaera ere. Baizik eta festak jarraitu egingo duela oraindik ere!
Onena etortzeko baitago oraindik, Zikuñagako jaietan. Gaurkoa eta biharkoa izango dira egun nagusiak, 10 urte betetzen dituzten festetan. Eta urteurren borobila ospatzeko, klasikoak diren ekitaldiak, tortilla lehiaketa, sagardo dastaketa eta danborrada kasu; eta nobedadeak, eskubaloi erakustaldia edo haurrentzako jolas bereziak bezala.
Tortilla onenaren bila, gaur
Jokuekin dibertitzen hasiko dute eguna haurrek, eta sukaldean helduek. Izan ere, 12:00etan daukate zita lehiaketarako tortillak entregatzeko. Ordu erdi beranduago sarituko dituzte sukaldari onenak, eta tortillak bezala, sagardoa dastatzeko aukera ere izango da.
Bazkalostean, berriz, jolasak hartuko du protagonismoa. Urarekin gerra egingo dute aurrena, eta Hernani eta Errenteriko taldeen eskubaloi erakustaldia ikusi ondoren, berriro segiko dute jokuek.
DJ Nemus, gaur eta bihar
Danbor hotsak ixilduta, musika jarriko dute Urumea txarangak aurrena, eta DJ Nemusek ondoren. Gaur eta bihar eskainiko du dantzaldia, eta jende asko hurbildu izan da, auzoan eskaini dituen saioetara.
Azken notak jarriko dizkio DJ Nemusek berak bihar, txapelketaz eta jolasez betea datorren azken festa egunari. Apar artean ere ibiliko dira haurrak, eta merienda eta txokolatada goxoa izango dute arratsaldean. Gaua iristean, azken dantzak eskainita, zezen suzkoarekin eta trakarekin agurtuko dituzte jaiak.