Urte honetan bi ipuin argitaratu ditu Dobera Euskara Elkarteak, Ipuin Faktoria ekimenaren barruan. Bigarrena, Chertat eta lehoia, Saharan aski ezaguna den Chertat pertsonajeari buruzkoa da, eta euskeraz eta arabieraz dago idatzita. Marrazkiak, berriz, Abdi Ami Omar sahararrarenak dira.
Hego Euskal Herrian udara pasa duten Saharako ume guztiei banatu nahi izan zaizkie ipuinak, eta dagoeneko, errefuxiatu kanpamenduetara iritsi dira; guztira, 450 inguru.
Umeen gustokoa
«Ipuina oso polita da, eta Chertat oso barregarria. Dena jaten du, harrapatzen duen edozein animalia: astoak, txerriak, txakurrak, zaldiak... Sutan jarri eta ahora eramaten ditu, eta bere ahoa gu baino haundiagoa da!», azaldu zioten Kronikari udara Hernanin pasa duten hiru haur sahararrek; Salka Ali Ramdam, Leila Abdi Embarek eta Usama Selma.
Dagoeneko itzuli dira Saharara, eta ipuin bana eraman dute beraiekin.
Dobera Euskara Elkartearen asmoa izan da haur guztientzako adina ipuin bidaltzea, eta dagoeneko lortu bada ere, oraindik badago laguntzeko aukera.
Liburu bat, edo partizipazioak, aukeran
Liburuak Dobera Euskara Elkartean bertan erosi daitezke (Larramendi kalea 11, behea), 15 eurotan; bazkideek 12. Era berean, partizipazioak ere erosi daitezke, 30 eurotan. Modu horretan, ipuin bat lortu, eta Saharara bidalitako beste bat ordaintzeko laguntza ematen da.
Azkenik, dirua ingresatuz ere lagundu daiteke, izen-abizenak jarriz, 2100 2403 81 0200139836 (La Caixa) kontu korrontean.
Zozomikoteak ere, eskuragarri
Chertat eta lehoia ipuinaren aurretik, Zozomikoteak argitaratu zuen Doberak, eta hori ere eskuragarri dago.