Legealdi berriko bigarren Plenoaren balorazioa egin du EH Bilduk, eta adierazi du bertan egiaztatu zela «EAJk bideratzen duen Udal Gobernua eta alkatea erabat lekuz kanpo daudela». Horrela, salatu du egin zituzten galdera guztiak erantzun gabe geratu zirela, edo «oraindik ez dugu aztertu, aztertzen ari gara» izan zela jaso zuten erantzuna.
«Egokitzapen guztiek epe bat behar dute, baina aurreko urteetako gai orokorren inguruan oraindik posiziorik ez du Udal Gobernu Taldeak: parte-hartzea, komertzioaren biziberritzea, kiroldegiaren berrantolaketa...», azaldu du EH Bilduk. Eta argitu du, eskatu dutela «kiroldegiaren bigarren faseko proiektua idazten jarraitzeko, eta komertzioa biziberritzeko beharrezkoa den laguntza zerbitzua kontratatzeko».
«Hondakinak dira Udal Gobernuaren gai bakarra»
Bestalde, EH Bilduk kritikatu du hondakinena dela «Udal Gobernuaren gai nagusia eta bakarra». Horretan, arau-hauste arinetan jakinarazpenak aplikatzea onartu zuten, isunak jarri baino lehen. EH Bilduk berak alde bozkatu zuen: «orain arteko praktikari jarraitzea da, eta pozten gara EAJk hondakinen gaia kudeatzeko isunak aplikagarriak direla onartu duelako».
Babes Ofiazialeko Etxebizitzekin izan duen jarrera ere kritikatu dio EH Bilduk EAJri, salatuz «presaz eta oposizioarekin eztabaidatu gabe» onartu dituela pleguak, eta aurreko prozesua itxi gabe beste bat ireki duela, «etxebizitza kopurua eta mota zehaztu gabe. Gutxienez, arraroa eta kezkagarria Zergatik hainbeste presa? Promotoraren mesedetan agian?».
«Herritarren parte hartzea mugatua izango da»
Anuskako lanetarako Fundazioaren gaian, bestetik, EAJ «barregarri» geratu zela adierazi du EH Bilduk, «prentsan aurretik esandako guztia gezurtatu baitzuen idazkariaren txostenak, eta inongo azalpenik eman gabe, aho batez onartu zen txostena». Eta beste «berri txar batzuk» ere aipatu ditu EH Bilduk: «batetik, Udalbiltzaren parte hartzeari uko egin zion EAJk; eta bestetik, herritarren parte hartzea mugatua izango da, Plenoen bukaeran bakarrik».
Albiste onik ere izan zela azaldu du EH Bilduk: Zarkumendegirako bidegorria eta saneamendu sarea egiteko azken pausoetako bat: «etxeko lan guztiak aurreko Udal Gobernuak eginda, aho batez onartu ziren lehiaketarako pleguak, urria aldera lanak has daitezen».