Erakusketa jarri dute ikusgai Donostiako San Telmo museoan, Elias Querejetaren inguruan. Elías, vida mía. Zinemari eskainitako bizitzaren argazkiak izena du erakusketak. Zinegile hernaniarraren figura eta lanari buruzko argazki erakusketa da. Museoko Laborategia gunean dago eta azaroaren 8ra arte egongo da ikusgai. Sarrera doakoa da.
Lau bloketan dago banatua erakusketa eta 60ko hamarkadan du hasiera. Lehenengo bi ataletan bere pelikulak bildu dira, bi alditan sailkatuak: frankismoaren urteak (1963-1977) eta zinema demokrazian (1977-gaur egunera arte). Hirugarren zatian ekoizleak Donostiako Zinemaldian izan zuen presentzia aztertzen da eta, amaitzeko, Querejetaren bizitza pribatuaren pasarte batzuk daude ikusgai (etxekoekin, lagunartean, kirolari-garaian... Erakusketan ikusgai egongo diren argazki gehienak ezezagunak dira.
Katalogoa salgai
Erakusketako argazkiak eta testuak biltzen dituen katalogoa argitaratu du San Telmo Museoak. Bertan José Luis Rebordinos, Naomi Kawase, Michel Gaztanbide, Ángel Sala, Lluis Fernández eta Pedro Usabaiagaren testuak azaltzen dira. Prezioa: 12 euro.