Lanak eginda eta helburua beteta bukatu du Gipuzkoako Liga, Hernaniko Maialen traineruak. Seigarren zegoen Ligako sailkapenean, eta postu horri eutsi asmoz joan ziren Colindresera (Kantabria) larunbatean, azken estropada lehiatzera. Ba postu horixe bera lortu zuten estropadan, eta baita helburua bete ere.
Aurretik izan zuten Donostiarra taldea, Ligako zazpigarrena, baina hiru puntu kendu behar zizkion Maialeni, eta bakarra atera zion. Hernaniarrek, bere aldetik, Orio talde indartsua utzi zuten atzetik, Colindreseko estropadan. San Juanek irabazi zuen azken lehia, eta Zumaia nagusitu da Gipuzkoako Ligan.
Kontxako estropadari begira
Gipuzkoako Liga bukatuta, urteko estropada garrantzitsuenari begira jarriko dira Hernaniko arraunlariak; Kontxako Banderari begira. Irailaren 3an jokatuko da sailkatze estropada, erlojuaren kontrako saioa, arratsaldeko 18:00etan.
Emakumezkoetan, lau traineru sailkatuko dira bandera lehiatzeko. Gauzak horrela, oso zaila izango du Maialenek, txartela lortzea.
Hernaniko arraunlariak, ‘Txoriene’ saioan
Uretatik kanpo ere mugitzen dira Hernaniko arraunlariak, eta ETB1eko Txoriene sukaldaritza saioan izan ziren joan den ostiralean. Ainhitze Kalonje arraunlaria eta Malen Oiarzabal patroia aritu ziren sukaldatzen, Zigor Iturrieta aurkezlearekin batera, baina talde osoa joan zen Miramongo estudioetara, traineru eta guzti.
Dagoeneko grabatu dute saioa, baina hilabete barru emango dute telebistan: irailaren 21ean, arratsaldeko 15:00etan, ETB1en.