Promesen Munduko Txapelketan izango dira bi palista hernaniar, irailaren hasieran. Amaia Irazustabarrena eta Maider Huitzi, biak hautatu ditu Espainiako selekzioak, 22 urtez azpiko Mundiala jokatzeko, Palentzian.
Irailaren 5etik 13ra izango da, eta paleta goma modalitatean ariko dira bi hernaniarrak, 30 metroko frontoian. Beste bi kidek osatuko dute taldea: Rebeka Contin eta Izaskun Arrosagarai nafarrek.
Partidu bakoitza bi palistak jokatuko dute, eta munduko selekzio indartsuenak izango dituzte aurrean: Mexiko, Argentina, Frantzia, Kuba...
Munduko selekzio indartsuenak izango dituzte aurrean, baina «zeozer polita» egitea espero dute.
«Aukerak badauzkagu zeozer polita egiteko»
Maila haundiko aurkariak izan arren, urruti iristeko esperantzarekin joango dira: «oraindik ez dakigu zein palista hautatuko dituen selekzio bakoitzak, baina aukerak badauzkagu zeozer polita egiteko», azaldu du Amaia Irazustabarrenak.
Zita haundira begira, Valentzian ari dira entrenatzen, eta asteburu honetan egingo dute azkeneko kontzentrazioa bertan. Gero, irailaren 3an joango dira Palentziara, Munduko Txapelketa jokatzeko.