Endika Barrentxea erremontista hernaniarrak jokatuko du Banakako Txapelketa Nagusiko Ligaxka, Uterga, Urriza eta Endikarekin batera. Atzo zuen jokoan ligaxkako pasea, eta erraz nagusitu zen Etxeberria IV erremontistaren kontra: 10-30.
Partiduko markagailuak erakusten duen moduan, Barrenetxea jaun eta jabe izan zen Galarretako pelotalekuan. Azpeitiako aurrelariak ez zuen egunik onena izan, eta agerian geratu zen txapelketara ez dela sasoirik onenean iritsi; kontuan izan behar da, lesio batetik atera berri dela. Barrenetxeak aldiz, joko ona duela erakutsi zuen hasieratik: bikain aritu zen peloteoan, sake onak egin zituen, sake-errestoan duen maila erakutsi zuen... Etxeberria IV baino gehiago izan zen, hasieratik bukaerara.
Barrenetxearen hobekuntza, agerian
Txapelketetako partiduetan halako emaitzak ematen dira, bat oso ondo aritzen denean, eta besteak egun txarra duenean. Atzo ordea, agerian geratu zen, baita ere, Barrenetxeak izan duen eboluzioa. Izan duen hobekuntza nabaria da; errekurtsoak dituen erremontista da hernaniarra, eta bikoteka erakutsi duen sasoia banakakoan ere erakutsiko duela dirudi. Hasteko, lau onenen artean dago, eta onena izateko bidea aurretik du. Orain, Urriza, Endika eta Utergaren kontra eman beharko du dena.