Bi egun besterik ez dira falta, kañonazoak festa lehertzeko Ergobin. Ostiralean hasiko dira jaiak, arratsaldeko 17:00etan, eta lau eguneko gozatua hartuko dute auzotarrek, astelehenera arte.
Hasi eta berehala, jolasean eta txokolate janean ariko dira haurrak. Eta gauean, giza proba izango da, auzoko talde baten eta Hernani errugbi taldearen artean.
Krossa, larunbatean
Lasterka esnatuko da auzoa larunbatean, Kross Herrikoiaren 7garren edizioarekin, 10:00etan. Izenematea interneten egin behar da, www.kirolprobak.com web orrian: txip propioa dutenek 9 euro, ez dutenek 12 euro. Egunean bertan ere izango da aukera, irteeran, 08:30etatik 09:30etara; 15 euro izango dira. Ondoren, idiak jarriko dira lehian, eta estreinako saioa izango dute Aiako Izetaren eta Arronako Etxetxoren pareek. Eta bazkaria ere ez da faltako, bola saioei, zezen suzkoari eta gaueko musika jaialdiari bidea eman aurretik.
Sagardo Lehiaketa eta herri kirolak, igandean
Igandea ere bete-betea dator Ergobin. Sagardo Lehiaketaren 54garren edizioa egingo dute eguerdian, eta Ane eta piraten saioaren ondoren, harri txikien momentuko jasotzaile onenak ariko dira Ergobiko baldarra harriarekin. Eta afariaren ondoren, harri proba izango dute Imanol Paollaren zaldiak, eta Emarri neska taldeak.
Idi proban, lau parte hartzaile. Jaien azken egunean jokatuko da idi proba, Ergobia Sari Nagusia, eta lau parte hartzaile izango dira: Errenteriko Matxain, Aiako Arzadun, Orioko Oliden eta Zaldibiko Elosegi. Bi txandatan ariko dira, 12:00etan eta 18:00etan; bakoitzean bi idi pare.