Aisialdian euskeraren erabilera sustatzeko asmoz, udaleku ibiltariak antolatu ditu beste urtebetez, Dobera Euskara Elkarteak. Aurten gainera, izan da nobedaderik; izan ere, ohiko udaleku ibiltariez gain, txikien edizio bat ere izan da. Bi udalekuak kontuan izanda, 57 neska-mutilek hartu dute parte.
Hainbat balore, udalekuetan
Udalekuak ibiltariak izatearen arrazoiak asko dira, eta horien artean dago, zenbait balorez jabetzea: «helburu nagusia euskeraren erabilera sustatzea bada ere, udaleku ibiltariekin bilatzen da gure gazteek natura errespetatzea, hezikidetza, elkarlana eta talde sentimendua bultzatzea, eta euskal kultura ezagutzea, inguru eta lagun berriak egitea, eta nola ez, ondo pasatzea!» dio Doberak. Bi udalekuen kasuan, balorazioa oso positiboa dela azaldu du Doberak.
Aurrenekoa, Gipuzkoako kostaldean barrena
DBHko 41 gaztek hartu zuten parte Udaleku Ibiltarien aurreneko txandan. 12 egunez, Gipuzkoako kostaldean barrena ibili ziren, Oriotik Zestoara, zehazki. Doberak azaldu duenez, urtetik urtera arrakasta haundiagoa dute udalekuek: «elkarrenganako jarrera oso ona izan da, eta giro oso polita sortu dute. Lagun onak egin dituzte eta udalekuetako watsapa ere sortu dute, harremanarekin jarraitzeko asmoz. Eguraldia ere lagun izan dute, aurten».
Urumea bailaran, bigarren txanda
Aurtengo nobedadea bigarren edizioa izan da, 9-12 urte bitarteko neska-mutilena. Urumea bailaran barrena ibili dira, Hernanitik Goizuetarako bidea eginez. Doberak azaldu duenez, ondo moldatu dira: «egonaldi ezberdinak kontuan izanda, gaztetxoei gehien Arano eta Goizuetako egonaldiak gustatu zaizkie. Eguzki askorik ikusi ez badute ere, antolatutako ekintzetaz gozatu dute».