Ergobia ibilbidea lurzatian Babes Ofizialeko 18 etxebizitza eraikiko dira epe motzean. Udalak Kronikari jakinarazi dionez, 18 etxebizitzak erosketa erregimenekoak izango dira, eta zozketan parte hartu nahi dutenek orain dute izena emateko garaia. Izen emate epea irailaren 9ra arte egongo da zabalik, eta beharrezkoa den dokumentazioa Astigarragako udaletxean entregatu behar da
Ez da ezinbesteko baldintza astigartarra izatea
Etxebizitzetan izena eman dezakete gainerako udalerrietako herritarrek ere. Izan ere, Astigarragako Udalak jakinarazi duenez, ez da ezinbesteko baldintza astigartarra izatea: «Gipuzkoako Aldizkari Ofizialean argitaratu zen moduan, baldintzetan jartzen du Euskadin erroldatua dagoen edonork eman dezakeela izena. Hala ere, Astigarragarekin lotura dutenek lehentasuna izango dute; hau da, erroldatuta daudenek edo bertan lana egiten dutenek».
Bestalde, jakinarazi dute, lehenengo zozketa egin eta gero etxe hutsak geratzen badira, Donostialdean eta Buruntzaldean bizi diren herritarren artea zozketatuko dituztela.
Nola jakin zeintzuk diren baldintzak?
Etxeen zozketan izena ematen dutenek hainbat baldintza bete behar dituzte. Baldintza horiek zeintzuk diren jakiteko hainbat bide daudela gogorarazi du Udalak: «beharrezkoa den dokumentazioa zein den Gipuzkoako Aldizkari Ofizialean argitaratu zen, eta udaletxeko webgunean eta iragarki taulan ere, eskuratu daiteke»
Eskaera Udaleko erregistroan entregatu behar dira
Aipatutako Babes Ofizialeko etxebizitzen zozketan parte hartu nahi dutenek eskaera orria bete behar dute. Orri hori www.astigarraga.eus webgunean eskuratu daiteke. Eskaerak erregistroan entregatu behar dira, irailaren 9a baino lehen.