Kronikak proiektu berri bat du eskuartean: Agenda bateratua. Hernaniko talde batzuen proposamena jaso eta gero, www.kronika.eus web orriko agenda garatzea erabaki da.
Kudeaketara, sarbidea
Agenda bateratuarekin lortu nahi dena da, bailarako talde eta elkarteei beraien ekitaldiak argitaratzeko aukera erraztea. Hau da, aukera izatea agendaren kudeaketa eta koordinaziorako gune pribatuan sartzeko.
Bide batez, erraztu nahi da ekitaldien fetxa eta ordu aukeraketa. Izan ere, bailaran geroz eta gehiago dira ekitaldi bat baino gehiago dauden egunak; eta tarteka, orduek ere koinziditu izan dute. Agenda honekin bilatu nahi da, denek izatea denen berri, eta data eta orduak aukeratzerakoan efizienteagoak izatea.
Azken ukituak, bileran
Asteartekoa bigarren bilera izango da, eta bertan azken ukituak emango zaizkio agendak izan behar duen funtzionamenduari. Beraz, Kronikak dei egiten die interesa duten talde eta elkarte guztiei, parte hartzera. Bilera asteartean izango da, arratsaldeko 19:00etan, Hernaniko Larramendi 11ko lokalean.
Erabilera, debalde
Agendak benetan funtzionatu dezan, bailarako talde eta elkarte guztiak egotea funtsezkoa da. Kronikak argitu nahi du, erabilera eta partehartzea doakoa dela.