Hernani-Iparragirre Sagardotegia gustora dabil bere lehenengo denboraldian. Maialen traineruarekin seigarren postuan dago Gipuzkoako Ligan, bi estropadaren faltan. Donostiarra bi puntutara dauka. Juanjo Etxarte entrenatzaileak denboraldiaren balorazioa egin dio Kronikari: «Guretzako ondo dijoa denboraldia. Denok oso gustora gaude egiten ari garen lanarekin; oso pozik gaude. Gure helburua hasieratik izan da hurrengo urtean uretan egotea eta arraunlariek ikustea eta ikastea zer den traineruan aritzea, gehienak oso gazteak baitira eta sekula traineruan aritu gabeak».
Baina hasieran postuari begiratu ez arren, orain seigarren postu horri eutsi nahi... «Helburua ez dugu aldatu, baina behin seigarren postuan egonda, eta bi estropada faltan, postu horri eustea polita litzateke. Eskura daukazun gauza bat da eta lortzea ederra litzateke jendea datorren urterako gogoz geratzeko. Bi puntuko aldea dugu Donostiarrarekin eta gutxienez estropada bat aurretik egin eta postu hori ziurtatzen saiatuko gara orain. Eta ahal bada, biak».
Bihar Ondarroan ariko dira (17:00) eta abuztuaren 22an Colindresen (Kantabria).
«Arraunlariak sendotu behar dira. Gazteak izanda, indar falta da nabaritzen dena. Teknika, berriz, oso ona dute»
Maialen, Kontxako sailkapen estropadan
Irailera begira ere badaude, Kontxako Banderako sailkapen estropadan parte hartuko baitute. Sailkatzeko esperantzarik ba ote duten galdetuta, halaxe erantzun du Etxartek: «Aurrean ibiltzen diren traineruek oso estropada txarra egin behar dute gu sailkatzeko. Oso zaila da hori gertatzea. Kontuan izan behar da gure taldea oso gaztea dela. 11 jokalari jubenilak dira, 18 urtetik beherakoak, eta batzuk 16 urte besterik ez dauzkate. 5 urte daramazkiten talde horien aurka lehiatzea oso zaila da».
«Daukagun taldearekin jarraitzen badugu, asko aurreratuko dugu»
Hemendik urte batzuetara, Hernanik asko hobetuko duela uste du Etxartek, indarra baita falta dutena: «Daukagun taldearekin urteetan horrela jarraitzen badugu, asko aurreratuko dugu. Arraunlariak sendotu behar dira. Indar falta da gehien nabarmentzen dena besteekin konparatuta. Teknika, berriz, oso ona dute. Agian, ez dago ondo esatea, baina beste talde askok baino arraunkera politagoa daukate. Urteak pasa ahala, pauso haundia hor emango dute. 24-25 urterekin egoten zara zure maila onenean, gorpuzkera onenean, eta orduan nabarituko da».
Blokeari eustea izango da erronka: «Bi talde gabiltza batera. Tolosako eta Hernaniko arraunlariak daude eta askotan zaila izaten da ondo uztartzea. Baina oso ondo aklopatu dira. Lotura horri eutsi beharko diogu. Beraiek behintzat gustora daude eta uste dut jarraituko dutela. Hori bai, ikasketek baldintzatuko dute, esan bezala, gazteak baitira, eta batzuk kanpora ikastera joango dira. Saiatu behar dugu blokea mantentzen».
Jasotako babesa, eskertzekoa
Uretako kontuak alde batera utzita, kanpoan, herrian, nolako harrera izan duen ere jakin nahi izan du Kronikak: «Estropadetara badakit familiakoak eta etortzen direla, baina gainontzean ez naiz asko jabetzen, gu gurean aritzen baikara zentratuta. Baina babesa eta laguntza jaso dugu eta hori azpimarratzekoa eta eskertzekoa da. San Joanetan ere postu bat jarri genuen eta jende asko gerturatu zen».
Txerri boda eta sagardo festa!
Euskal Jaien barruan, irailaren 18an eta 19an, txerri boda eta sagardo festa egingo ditu Arraun Elkarteak, Gipuzkoako Sagardogileen Elkartearen eta Basatxerriren pruduktuekin.
Atsegindegin izango da, eta bertan, afariak eskainiko dituzte bi egunetan. Giroa alaitzeko, bertsolariak eta beste ezustekoren bat prestatuko dute. Xolomoa, saltxitxak, hanburgesak eta entsalada egongo dira aukeran; sagardoarekin batera dastatzeko.
Larunbat horretan, herri bazkaria ere antolatuko dute. Bazkarirako txartelak tabernetan jarriko dituzte salgai. Helduentzako menuak 18 euroko prezioa izango du, eta honakoa izango da: Marmitakoa, Basatxerri xolomo burua pikillo piperrekin, Idiazabal gazta menbrilloarekin eta sagardoa. Haurren menuak, berriz, 10 euro balioko du: Basatxerri txorixoa, Ekain hanburgesa, baserriko izozkia eta ura.