Hilaren 1ean hasi zen Donostiako Musika Hamabostaldiaren 76garren edizioa, eta abuztuaren 30era arte, hainbat kontzertu, emanaldi, ikuskizun, irteera eta jarduera antolatu dira. Tartean, 13 hernaniar ariko dira kantari.
Aurtengo edizioan Jose Maria Usandizaga konpositore donostiarra izan da gogoan, hil zela 100 urte pasa baitira. Hori horrela, Usandizagaren sorkuntza lanaren ikuspegi zabala eskaini nahi izan du aurten Hamabostaldiak, eta bere hainbat lan interpretatuko dira: ganbera musikarako idatzitako hainbat lan, organorako sortutako beste batzuk, eta Mendi-Mendiyan opera. Hain zuzen, opera horretan kantatuko dute hernaniarrek, Easo abesbatzarekin batera.
13 hernaniar, Easo abesbatzarekin bat eginda
Juan Carlos Solano izan da ahots hernaniarrak fitxatu dituen abeslaria. Solano bera hernaniarra da, eta Donostiako Easo abesbatzan kantatzen du. Nonbait, entzuna zuen Hernanin bazela nesken koro bat, ondo funtzionatzen zuena. Usandizagaren Mendi-Mendiyan operan Easo abesbatzako kantari guztiek kantatuko dute; bai mutilek, eta baita neskek ere. Baina, bereziki nesketan, multzo haundiagoa osatzeko beharra zutela ikusita, Hernanira jo zuen Solanok.
Horrela, Hernaniko 13 abeslarik hartuko dute parte Donostiako Musika Hamabostaldian: ‘Hernani’ Musika Eskolako abesbatzako Vinaixa Garciak, Idoia Ansorenak, Amaia Azkuek, Leire Leonetek, Alazne Aldayturriagak, Maider Otegik, Olaia Arrietak, Saioa Pachek, Aloña Berazak, Nagore Torres eta Estebe Atorrasagasti ahots zuriak; eta Kantuz abesbatzako Rosana Caballerok eta Nekane Rekondok.
Operaren kontzerturako bertsioa, hilaren 22an
Usandizagaren Mendi-Mendiyan operak artzain talde baten bizimolde eta ohiturak gogoratzen ditu; bertako giroarekin eta herriaren melodiekin jantzita, Usandizagak tragedian bukatuko den istorioa kontatzen du, bere obrarik ezagunenetakoa den honetan.
Donostiako Hamabostaldiaren barruan, abuztuaren 22an izango da kontzertua, 20:00etan, Kursaal Auditorioan. Kasu honetan, operaren kontzerturako bertsioa interpretatuko da; hau da, ez da opera antzeztu bat izango.
Hernaniarrek Easo abesbatzarekin batera kantatuko dute; musika, berriz, Euskadiko Orkestra Sinfonikoak jarriko du, eta hainbat bakarlari ere arituko dira kantuan. Guztia, Antoni Ros Marbak zuzenduko du.
Udara osoa lanean daramakite, bakarka eta Easo abesbatzarekin entsaiatzen, eta beste kontzertu bat prestatzen.
Sarrerak salgai, dagoeneko
Kontzerturako sarrerak salgai daude dagoeneko; eserlekuaren arabera, prezio desberdina dute. Erosteko, Musika Hamabostaldiaren webgunean sartu, edo Kursaalen galdetu.
Udara osoan, gogor lanean
Abeslari hernaniarrek udara osoa daramakite ahotsak prestatzen eta operako kantuak ikasten. Hernanin aritu dira lehenengo, Garbiñe Orbegozo, ‘Hernani’ Musika Eskolako irakaslearekin. Horrez gain, Donostiara ere joan dira, Easo abesbatzarekin eta Orkestra Sinfonikoarekin entsaiatzera.
«Azkenerako, lan eta lan ari dira. Gainera, Easo abesbatzaren erritmoa ez da gurea bezalakoa», azaldu du Orbegozok. «Oso zorrotzak dira, detaile guztiak zaintzen dituzte, eta konpromiso haundia eskatzen du. Kontzertuan abeslariek zein erropa jantziko duten ere aurretik erakutsi behar dute, zuzendariaren onespena jasotzeko!».
Egiten ari diren lana, gainera, ez da Donostiako Musika Hamabostaldira mugatzen. «Usandizagaren herio-tzaren urteurrena dela eta, Errenterian kontzertu berezia prestatu zen uztailaren 31n, bertako Musika Bandarekin. Han ere izan gara, Mendi-Mendiyan operaren zati bat, San Inazio Martxa eta Txanton Piperri kantatzen».
Baina Hamabostaldikoa, berezia izango da, seguru. «Hainbeste lan hartuta, abeslariak larritu egin dira pixka bat, baina Kursaaleko oholtza gainera ateratzean, guztiak merezi izango du!».
MUSIKA HAMABOSTALDIA:
Organo Zikloa: abuzuak 1-7
Antzinako Musika Zikloa: abuztuak 3-7
Haurren Eguna: abuztuak 11
Interprete Gazteen Zikloa: abuztuak 17-21
Musika Garaikideko Zikloa: abuztuak 24-29
Hil osoan zehar: kontzertu eta emanaldiak Kursaal Auditorioan eta Victoria Eugenia Antzkokian. Horrez gain, Musika Aitzaki programaren barruan, hainbat irteera eta emanaldi berezi izango dira. Bestalde, tailerrak, ikastaroak, eta bestelako ekintzak ere izango dira.
*Sarrerak erosteko: www.quincenamusical.eus webgunean
*Musika Hamabostaldiko
Programa osoa ikusteko, egin klik hemen