Astigarragako Udalak prentsa ohar bidez jakinarazi du, Kiriketa haurreskolaren eremu berriko egokitze lanak Lurgoyen enpresari esleitu dizkiola: «bilera egin da, eta obrak azkartzeko eskatu da, helburua baita 2015-2016 ikasturterako haurtzaindegiaren eskaintza asetzea. Eraikin berriko lanak abuztuan zehar egitea aurreikusten da, urrian matrikula epe berria ireki ahal izateko».
Oharrean azaldu dutenez, obrak ez dira Kiriketa haurreskola kokatua dagoen eraikinean egingo, kale berdinean alokatutako lokalean baizik: «behin behineko konponbidea izan arren, eta guztiz erosoa izan ez arren, plaza gabeziak konponduko ditu. Haurreskolak ezin dio eskaera guztiari aurre egin, eta horregatik onartu du Euskal Gobernuak zatiketa. Aurreko gobernuak maiatzaren 25ean aurkeztu zuen berritzeko proposamena. Baldintzak GAOn ekainaren 12ra arte ez ziren argitaratu, eta 26 eguneko epea jarri zen eskaerak aurkezteko. Horrek eragin du irailerako prest ez egotea».
Prentsa oharrean dio, EAJ-PNVren udal gobernuarentzat garrantzi haundia duela kalitatezko haurreskola zerbitzu publikoa emateak: «azkartzeari esker, ikasturtea normaltasunez hasiko dute eta urrian matrikula epe berria irekitzea posible izango da».