1915eko uztailaren 31n jaio zen Ignacia Altolagirre, eta bizitzako urte gehienak Hernanin egin ditu, Kaxkoko Andrekalen. San Inazio egunez ditu urteak Ignaciak, eta aurten badu zer ospatu: 100 urte betetzen ditu!.
Burua argi-argi du Ignaciak, eta sasoirik ere, ez du falta. Ilusioarekin bizi du 100garren urteurren hau, eta merezi bezala ospatzeko Artikutzara joango da familiarekin: «berdea nahi dut, naturaz gozatu, familiarekin». Zer moduz sentitzen den galdetuta, Ignaciak hitz bat nahikoa du: «primeran». Jendeak kaletik «zaindu zaitez» esaten omen dio askotan, eta bere erantzuna izaten omen da: «zaindu zaitez zu, ni nahikoa zaindu nahiz eta!».
100 urte hauetan denetatik bizitu du Ignaciak. Gerrako urte haiek ederki asko gogoratzen ditu, lehenengo pertsonan bizi izan baitzituen: «Gernika bonbardeatu zutenean Durangon bizi nintzen, eta ez zaizkit sekula ahaztuko aste haiek...».
Sekretua: «gen onak ote?»
100 urtera iristeko sekretua zein izan den galdetuta, Ignaciak dio ez dakiela, baina aurretik, bere ahizpa ere 103 urtetara iritsi zela: «familiko genak izango dira, onak direla» dio, barre artean.
Goiz Eguzkin omenaldia, ohorezko bazkideari
Goiz Eguzkiko lagunekin une atseginak pasatzea da, Ignaciaren plazerretako bat. Lagun horiek, omenaldi txiki bat egin nahi izan diote, errekonozimendu plaka eta guzti. Esker hitzekin jaso zuen omenaldia Ignaciak, eta Paco Goya presidenteak esan zion moduan, «zer gutxiago, Goiz Eguzkiko ohorezko bazkidearentzat».