Badira urte batzuk Astigar elkartea, eta bere baitan, Astigar dantza taldea sortu zirela; 40 urte, hain juxtu. Eta 40 urte hauetan, urtero-urtero, hutsik egin gabe, soka dantza egin da Santio egunean, uztailaren 25ean.
Hori ospatzeko, omenaldi txiki bat antolatu dute.
Aurreneko soka dantzan, 20 bikote
Urtero, Santio egunean soka dantza egiten da. Aurreneko aldiz, Astigar taldeko 20 bikote atera ziren dantzara, 1976ean.
Garai hartan, Martin Ormazabal eta Joxe Alberro aritzen ziren irakasle lanetan; orduko Argia dantza taldeko dantzariak, biak.
Hasiera hartan, Santio egunean dantzatzeaz gain, San Roke egunerako ere emanaldi bat prestatzen zuen Astigar dantza taldeak.
Udalbatzaren soka dantza, eguerdian
Gaur egun, Udalbatza osatzen duten zinegotziek dantzatzen dute aurrena. Aur-ten ere, Foru plazan dantzatuko dute, eguerdiko 12:30etan. Normalean, dantzariek laguntzen diete aurresku eta atzesku lanetan.
Arratsaldeko emanaldia, omenaldi eta guzti
Santio eguneko arratsaldean, berriz, Astigar dantza taldeko gaztetxoen emanaldia izaten da frontoian, 18:00etan. Aurten ere ez dute hutsik egingo.
Horrez gain, soka dantza egiten dela eta Astigar dantza taldea sortu zela 40 urte pasa direla ospatzeko, omenaldi txiki bat egingo diete garai hartako irakasleei: Martin Ormazabal eta Joxe Alberrori, hain zuzen.