Astigarragako Santio jaietan izango zarete. Nolako ikuskizuna daukazue prestatuta?
EPA! Ikuskizuna eramango dugu Astigarragako oholtzara. Gure bigarren lana da eta lehenengoan bezala, a capella estiloan oinarritzen den ikuskizun musikal bat da; bertan musika eta lau pertsonajeen sketchak elkartzen dira kontzertu bat baino gehiago eskainiz. Baina bigarren honetan euskal kantetan inspiratu gara (Xalbadorren Heriotzean, Bagare, Lau Teilatu, Maitiak Galdegin zautan, besteak beste) gure moldaketak eta perbertsioak egiteko; sanba, reggae, bollywood, jazz estiloetara eramanez.
Umorea da zuen emanaldien ezaugarri nagusia, ezta?
Bai, umorea dago hasiera-hasieratik. Eta hasieratik argi geneukan zer edo zer dibertigarria izan behar zela; ez bakarrik publikoak ondo pasatzeko, baizik eta guk ere disfrutatzeko. Gainera, gure zuzendaria, Patxi Barco, genero askotan aritu den arren, komedian nabarmentzen da. Emanaldietan umorea ikus daiteke abestien modaketetan, lau pertsonajeen nortasun xelebreetan, koreografietan, gidoian... Gidoia Patxi Barcok eta Kepa Errastik egin dute eta hau da sinopsia: lau pertsonajeak konbentzituta daude munduko estilo musikal guztien jatorria gure folklorean bilatu behar dela. Hau da, jazz, swing, afrikar musika… euskal musikatik sortu direla.
Zein elementu nahasten dira zuen saioetan?
Abestiak gehienak a capella badira ere, emanaldietan instrumentoak ere jotzen ditugu: gitarra, teklatua, esku-soinua eta kajoi flamenkoa. Bestetan, guk egindako base musikalen gainean abestu eta dantzatzen dugu. Horrela, dinamika ezberdinak sortzen dira emanaldian zehar, eta koreografiak ondo etortzen zaizkigu ahotsak deskantsatzeko. Baina, gure emanaldiak kontzertu bat baino gehiago eskaintzen du, beraz, musikaz aparte, gidoi bat badago abestiei lotura eta ikuskizunari zentzua ematen diena.
Antzerkia egiten duzuela esan liteke?
Emanaldiaren %80a musika da, baina abestiak lau pertsonajeen harrikadekin nahasten direla esan daiteke. Patxi Barcoren lana izan da pertsonajeak zutik jartzea eta emanaldiari koherentzia ematea. Ez da lan makala berak egiten duena. Gainera, beti hobetzen saitzen gara, bai antzerkiari, bai abestiei dagokienez.
Zer da ikusleek gehien atsegin dutena, Demodé Quartet-en ikuskizunetan?
Uste dugu, alde batetik, gure betiko kantak beste era batean entzutea dela gehien harritzen duena. Adibidez, Sarri Sarri moldaketak barreak sortarazten ditu beti, edo Loa loa seaska kanta bollywood kanta-dantza bat bihurtzea… Eta bestetik, guk oso ondo pasatzen dugula ikustean, publikoak ere gehiago disfrutatzen du.
Zer da benetan berezi edo desberdin egiten zaituztena?
Gure abestien moldaketak originalak eta freskoak direla, espero ez diren estiloak sortzen ditugu betiko kantekin.
Zertan oinarritzen zarete, horrelako ikuskizunak prestatzeko?
Lanean eta lanean eta lanean… ez dago besterik!
Nondik ateratzen dituzue ideiak, nondik inspirazioa?
Gure umoretik, gure jolasetik… Entsaioetan oso ondo pasatzen dugu, eta horrek laguntzen dio sormenari, baina ez gaude beti barrez, lan serio bat atzean badagoelako (armoniak prestatu, gidoia, entsaioak, grabaketak, antolamendua…).
Zer dela eta hasi zineten espektakulu hauek egiten?
Horrelako ikuskizun bat egitea buruan bagenuen aspalditik, gure diziplina guztiak nahastuko zituen ikusizun bat: musika, antzerkia, umorea… Horrela hasi ginen entsaiatzen eta ahotsak enpastatzen 2008 urtean.
Bost urtetan, makina bat emanaldi eskaini dituzue.
150 emanaldi baino gehiago. 2010eko maiatzean gure lehenego ikuskizuna “DQ” estreinatu genuenetik antzerki-areto aunitzetatik pasatu gara; haien artean, Donostiako Antzoki Printzipala eta Kurtsaala, Bilboko Arriaga edota Campos Eliseos Antzokia. Era berean, ekitaldi haundietan ahotsa zein aurpegia jarri dugu; 2013ko Donostiako Zinemaldian, esate baterako. Eta 2013ko azaroan bigarren ikuskizun musikala estreinatu genuen: Epa!. Bigarren ikuskizun honen aurkezpenaren bira luzean gabiltza murgilduta uda honetan ere, Euskal Herrian zehar. Eta aldi berean, uda honetako asteazkenetan Madrilgo Lara Antzokian gaude “DQ” ikuskizunarekin. Eta momentuz oso kritika onak jaso ditugu!
Zer ematen dio taldeko kide bakoitzak Demodé Quartet-i?
Musikalki estilo ezberdinetatik gatoz: jazz, pop, musika elektronikoa edota kantautore musikatik. Honi gehitu behar diogu pertsonalki ere oso ezberdinak garela, eta hori oso aberasgarria dela gure kasuan. Dena den, nahiz eta oso ezberdinak izan, nahiko ondo entenditzen gara musika sentitzeko momentuetan. Hori musikari dagokionez, bestetik Patxi Barcoren lana oso argi dago, antzerkiarekin zerikusirik daukana bere eskuan dago.
Taldea ezagutzen ez duena, nola animatuko dugu zuen saiora joatera? Zer aurkituko dute bertan?
Freskura, dibertsioa, umorea, armonia berriak… aurkituko dituzte. Beraz, ondo pasatzera eta gure ahotsekin disfrutatzera animatzen ditugu euskaldun guztiak. n