Goiz, arratsalde eta gau bakarrik ez, eguerdian ere aprobetxatuko dute astigartarrek, mahaiaren inguruan elkartu eta ondo pasatzeko. Ia egunero egingo dituzte herri bazkariak, talde desberdinek antolatuta, eta izena emateko aukera badago oraindik, zenbaitetan.
Bihar, haur bazkaria antolatu du Xaguxar elkarteak, Foru plazan, eta Xaguxarren udalekuetan ari dira txartelak saltzen. Eta Joseba Barandiaran plazan, Gaztelekuko bazkaria egingo dute; txartelak erosteko, gaur da azken eguna, Gaztelekuan bertan.
Gazte eta erretiratuek, etzi
Beste bi bazkari izango dira etzi. Txosnako karpan, gazte bazkaria egingo dute. Eta erretiratuek, Galtzaur elkartean daukate zita, otordu eder baten bueltan biltzeko.
Eta jaien azkeneko egunean ere, ez dira herri bazkariak faltako, Santa Ana egunean. Beste bi bazkari izango dira. Ipintza sagardotegian bat, baina txartelak aurrez erosi behar ziren. Bestea, berriz, txosnako karpan egingo dute, elkartasun bazkaria. Zipotza eta Ikatza tabernetan lortu daitezke bertan bazkaltzeko txartelak.