Badatoz Santio jaiak, eta Astigarragako Udalak Beldur Barik programa jarri du martxan, jai giroan eraso sexistei aurre egiteko asmoarekin. Kanpainaren helburua da, eraso sexistak saihestea, eta bide batez, epe luzera herri mailako prozesu bat martxan jartzea. Gazteei zuzendutako kanpaina da, eta bultzatu nahi da eraso sexualen identifikazioa, prebentzioa eta erantzun indibidual eta kolektiboak ematea.
Bi ekintza, kanpainan
Kanpainak bi ekintza izango ditu. Batetik, Kaleak, gauak eta jaiak geureak dira tailerra. Bertan erakutsiko da jaietan eman daitezkeen eraso sexistak nola prebenitu; aurre egiteko tresnak landuko dira. Tailerra etzi, astelehenean izango da, 16:00etan, Udalean. 12-29 urte bitarteko gazteei dago zuzendua.
Bestetik, Beldur Barik gunea sortu nahi da. Uztailaren 25ean izango da, 20:30etan, Barandiaran plazan. Bertan landuko dira arrisku egoerak, prebentzioa eta identifikazioa. Eta baita ere, Beldur Barik gunea espazio seguru bezala aldarrikatuko da.