Garraio Hiriaren proiektua bertan behera uztea erabaki zuen Bidegik ekainaren 24an, eta honen inguruan prentsa oharra bidali du EH Bilduk Kronikara. Bertan dio, Bidegi oraindik EH Bilduren ardurapean zegoenean hartu zela erabakia eta albiste ezin hobea dela Astigarraga eta astigartarrentzat: «Garraio Hiria proiektuaren arabera, 2 plataforma eraikiko lirateke autopistaren bi aldeetan; Anoetako 15 futbol zelai baino gehiagoko hormigoi eta asfaltozko okupazioa izango genuke. Honek herritarrontzako ez zuen zerbitzu eta onurarik ekarriko, baina bai, kalte ugari: paisaian, ingurumenean, zarata kutsaduran... Astigarragak berriz ere herrialde mailako azpiegitura bat jasan beharko luke, eta dagoeneko eskuzabaltasun gehiegi izan du: garraio hiria, AHT, Urumeako Autobidea, A8aren bigarren ingurubidea...
«EH Bilduren jarrerak, eragina»
Prentsa oharrean dio, Astigarragako EH Bilduk izan duela eragina erabakian: «Astigarragako EH Bilduren jarrerak izan duen eragina aipatu nahiko genuke, aurreko legegintzaldian, 2014ko azaroaren 27an egin zen Plenoan, proiektuaren aurkako alegazioak onartu ziren EH Bilduren aldeko botoekin, EAJren abstentzioarekin eta H1!en aurkako botoekin».
Astigarragako EH Bilduk, bertako EAJ eta PSE alderdien jarrera ere, salatzen du prentsa oharrean: «gezurrekin bazterrak nahastu dituzte, euren posizioa argi eta garbi azaldu gabe. Mahai gainean ordea, badaude hainbat datu: Arantxa Tapia astigartar jeltzaleak jarri zuen martxan Markel Olanoren aurreko legealdian; eta Zorione Etxezarragak eta Mikel Duranek aldeko botoa eman zuten Gipuzkoako Batzar Nagusietan. Beraz, behingoz bere posizioa argi azaltzea eskatzen diegu».
Mozioa, Udalean
EH Bilduk alternatiba badagoela dio, eta mozio gisa sartu du (ikusi: www.kronika.eus): «leku berean, ustiapen ekologikoa izango duen agroaldearen proiektua bultzatzeko eskatzen dugu, eta gainontzeko erakunde eta elkarteekin kooperazioa eta lanketa hasteko. Aukera paregabea izan daiteke baratzak berreskuratzeko, eta herria nekazaritza ekologikoaren erreferente bihurtzeko. Eta baita enplegu berdea sustatzeko ere; enplegua sortzeko jarduera ekonomiko jasangarria. Guztiok gure posizioa garbi azaltzeko garaia da».