Aurreko asteazkenean egin zuen aurreneko Plenoa, Astigarragako Udal berriak, eta bertan erabakitakoaren balorazioa egin du EH Bilduk. Horrela, kritikatu du alkateak ez diola «lanaldi erdia ere eskainiko Astigarragari eta astigartarrei».
Azaldu du, %47ko lanaldia izango duela, eta salatu du bere soldata igo izana: «%47ko lanaldiarekin, 21.000 euro kobratuko ditu. Aurreko alkateak, %100eko lanaldiarekin, 28.000 euro kobratu zituen. Beraz, soldataren %59,6ko igoera izugarria oparitu diote EAJk eta PSEk, Astigarraga soldata igoeren podiumean lehen postu tristean kokatuz».
EH Bilduren ustez, alkateari ez dio «interes eta lan haundirik ekarriko» karguak, eta astigartarrei zor dien errespetuan «lehen egunean huts egin du. Astelehenetik asteazkenera alkate, eta ostegunetik igandera enpresari? Agian, alkate kargua 24 ordukoa dela ahaztu zaie berari eta EAJri».
«EAJren lan egiteko gogo falta lehen egunetik azaleratu da»
Modu berean, EH Bilduk adierazi du lehen egunetik azaleratu dela «EAJren lan egiteko gogo falta. Plenoak bi hilabetetik behin egitera pasako dira, eta horrela, Udalaren jarduna eta oposizioak eta herritarrok udal gobernuari egin beharreko fiskalizazio publikoa erabat baldintzatu eta mugatuko dira. Ezohiko pleno ugari egin beharko dira Udalaren martxa ez mantsotzeko, edo bestela, lan ez egiteko gogo horri eusten badiote EAJkoek, erabakiak atzeratu eta atzeratu besterik ez dira egingo».
EH Bilduren ustez, «Astigarragak alkate bat izango duela bai, baina aginduko duena itzalpeko alkate bat izango da».
«Zinegotziek, alkateak berak baino gehiago eskainiko diote Udal jardunari»
Modu berean, EH Bilduk gaineratu du hiru zinegotzi liberatuek, alkateak baino liberazio gehiago izango dutela, «surrealismo kutsua areagotuz. Hau da, zinegotziek, alkateak baino gehiago eskainiko diote Udal jardunari. Sinestezina baina egia. Gure ustez, Astigarragak alkate bat izango duela bai, baina aginduko duena itzalpeko alkate bat izango da. Plenoan argi eta garbi ikusi genuen, alkateak nola uneoro beste baten aginduak jasotzen zituen».
Bere aldetik, zinegotziei emango zaizkien dietei uko egitea erabaki dute EH Bildukoek, «aurreko legealdiko ildoari jarraituz eta koherentzia mantenduz», eta baita hiru telefono mugikorrei ere. Eta adierazi dute, aurreneko Plenoan EH Bildu «existituko ez balitz bezala» jokatu zutela EAJk eta PSEk, eta egiteko aukera izan zuten galderetan, ez zutela jaso «ia erantzun edo aipamenik».