Arrakasta haundia izan du, aurten ere, Baan Marina fundazioak San Joanetan jarri duen tonbolak. Antolatzaileek azaldu dutenez, opari pila bat banatu dira beste behin: «asko banatu dira: telebista, kafetera, baloiak, loreak, kolonia... Lortutako dirua Baan Marinara bideratuko dugu».
Gogoratu dute Baan Marina fundazioak urte asko daramazkila Thailandian lanean: «emakume askori josten erakutsi zaie, eta horrekin lanbide bat eman zaie aurrera atera ahal izateko... Horrez gain, nekazaritza, informatika, osasun gaiak... garatzen dituzte eta tribuetako herritarrei hirira etortzen laguntzen diete: lanpostu bat bilatu, paperak egiten lagundu, ospitalera joan...».
«Lan asko, aurretik»
Baan Marinak Thailandian urte asko badaramazki ere, gogoratu dute oraindik lan asko dagoela egiteko: «beste irakaskuntza eta erreferentzi zentro bat ireki nahi dute Lamphunen, eta hara bideratuko da lortutako dirua. Industria asko dago herri honetan, eta helburua da neska eta emakumeen egoera hobetu eta babestea».