Frantziako Pau hirian da Amaia Irazustabarrena palista hernaniarra. Femina Tour txapelketa jokatzen ari da Irazustabarrena, Maider Mendizabal anoetarrarekin batera, eta partidu guztiak irabazita iritsi dira finalera: ligaxkako bi partiduak, final laurdenetakoa eta finalerdietakoa.
Finala, bi haundiren kontra
Bide zailena eginda, txapela lortzea da orain, Irazustabarrena eta Mendizabalen nahia. Finala pala munduan izen haundia duten bi jokalariren kontra jokatuko dute: Maritxu Housset eta Amaia Etxeleku. Iparraldeko bi jokalariak dira, egungo munduko txapeldunak. Paun izango da lehia gaur, arratseko 19:00etan hasita.
«Finala irabazteko klabea atzean egon daiteke»
Partidu zaila, gogorra eta luzea izango dela aitortu dio Irazustabarrenak Kronikari: «dugun onena emateko prest gaude. Klabea atzeko koadroetan egon daiteke, hor hutsuneak bilatzean». Irabazi edo galdu, finala saria dela dio hernaniarrak: «munduko txapeldunen kontra jokatzea dagoeneko saria da».
Bi gonbidatuak
Femina Tour txapelketan Frantziako palistek hartzen dute parte, eta aurten Gipuzkoako eta Nafarroako palistak ere gonbidatu dituzte. Maila bikaina eman dute, Gipuzkoako bikote bat finalera iristeaz gain, Nafarroako bikote batek finalerdia jokatu baitzuen.