Giro ederra izaten da udako arratsetan Ereñotzuko Irrintzi tabernan. Eguraldi onak lagunduta, asko izaten dira terrazan elkartzen diren auzotarrak. Giro on hori sustatu eta mantentzeko proposamen berri bat dute oraingoan: uztaileko ostegunetan musika emanaldiak izango dira. Gaurkoa izango da aurrenekoa, Duo Do Portu taldearekin, 21:00etan. Gainontzeko lau ostegunetan berriz, Roberto Yaben, Juan Mari Beltran Hirukotea, Idoia ta Kixtiñe eta MM’Atarrak taldeekin gozatzeko aukera izango da; lau kontzertu horiek 20:30-21:30etara izango dira.
«Auzo Udalaren laguntza ezinbestekoa izan da»
Irrintzi tabernak Kronikari aitortu dionez, bazuten halako zerbait antolatzeko asmoa, «baina arazoa betikoa zen, ekonomikoa». Auzo Udalaren proposamena entzun zutenean beraz, ezin ezetzik esan: «sostengu ekonomikoa klabea izan da». Hasiera bateko helburua zen Hernaniko taldeek ematea ostegun guztietako kontzertuak. Azkenean ez da posible izan, eta bi ez dira bertakoak izango. Hala ere, giro ona ziurtatua izango da, eta beraz, ereñotzuar eta hernaniar guztiak gonbidatu dituzte ostegunetan Ereñotzuko Irrintzi tabernara gerturatzera.