«Ignacio Ocio da egun Hernanin eskubaloia bizirik egotearen arduraduna edo erruduna, eta merezi duen errekonozimendua eman nahi diogu» dio Hernaniko Eskubaloi taldeak, Kronikara bidalitako oharrean. Jarri dute data: uztailaren 18an omenduko dute Ignacio Ocio, Hernaniko eskubaloiaren alde egin duen lan guztiagatik.
Eskubaloi taldeak azaldu duenez, Ignacio Ociok lan haundia egin zuen kiroldegia eraikitzeko: «bera da kiroldegia eraiki izanaren arduradunetako bat; eta baita bigarren pista ere. Orduan talde asko zeuden, eta entrenatzeko zailtasun ugari izaten zituzten... probintziako gainerako kluben inbidia zen».
Entrenatzaile gisa, eskarmentu haundikoa
Kiroldegiaren alde egindako lana eskertzekoa bada ere, Eskubaloi taldeak entrenatzaile gisa izan duen ibilbidea goraipatu nahi du: «taldeko entrenatzaile goraipatuena izan da. Ohorezko mailako nesken taldearekin Europan jokatu zuten; eta baita probintzia mailako txapelketetan, igoera faseetan... denboraldi berean neska eta mutilak entrenatzera ere iritsi zen. Bere anekdota, malko, izerdi eta odolarekin klubaren historia idatzi daiteke... Balore asko irakatsitako entrenatzailea izan da: herria, koloreak eta lana maitatzen erakusten zien, berarekin aritzen ziren guztiei. Gaur egun ere, berak utzitako kastak laguntzen gaitu goazen lekura goazela. Bukaeraraino borrokatzen erakutsi izan digu, helburua lortu arte».
Ignacio Ocio ez da momentu onak pasatzen ari, eta Eskubaloi taldeak babesa eman nahi dio: «osasun arazoak ditu, eta berak dioen moduan, bizitzako partidurik garrantzitsuena ari da jokatzen. Guri emandako guztia itzuli nahi diogu, eta borrokan jarraitzera animatu, helburua lortu arte».
Omenaldia, uztailaren 18an
Ekitaldi txiki bat antolatu dute. bazkari baten bueltan, uztailaren 18an, eta bere bizitzaren parte izan diren guztiak gonbidatu dituzte, parte hartzera. Izena emateko: 669 845 896.