Herriko txikienei iritsi zaie udaz gozatzen hasteko garaia. Eskola egunak atzean utzi, eta gaurtik aurrera, 410 haur ibiliko dira hiru astez udaleku irekietan. Abestu, jolastu, tailerretan parte hartu, lagun berriak egin... goiz pasa ederrak dituzte aurretik, neska-mutilek. 28 taldetan banatuta ibiliko dira, eta 64 begirale izango dituzte. Udaleku irekiak uztailaren 24ra arte izango dira, goizeko 09:30etatik eguerdiko 13:00etara, eta adinaren arabera, puntu jakin batetik abiatuko dira: HH1 eta 2ko haurrak Atsegindegitik; HH3 eta LH1eko ikasleak Biteritik; LH 2 eta 3koak Tilosetatik, Urumea paretik; eta LH4koak Tilosetatik, baina Kioskoaren atzeko aldetik.
Urteroko legez, denetatik egiteko aukera izango dute hiru aste hauetan: altxorraren bila, txotxongiloak, tailerrak, jolasak... Eta nola ez, hain estimatuak diren ekitaldiak: San Fermin eguna, igerilekuetara irteera, ur festa...
Gaztetxoak, astelehenetik
Kirolaz eta euskaraz gozatzeko aukera ere izango dute herriko gaztetxoek aurten. LH 5 eta 6 mailetako 108 gaztetxo ibiliko dira aurten, bost taldetan banatuta, 11 begiralerekin. Astelehenean hasi, eta uztailaren 24ra arte izango dituzte, hauek ere, udalekuak. Egunero ordu eta leku berean dute hitzordua: 09:15etan, kiroldegiko frontoiko eskaileretan. Udalekuak eguerdiko 13:00ak bitartean izango dira, eta aurten ere, kirol ugari praktikatzeko aukera izango da: eskalada, piragua hondartzan, errugbia, ur parkea, orientazioa, btt, atletismoa...