Imanol Ansa urnietarra eta Aritz Zubiri goizuetarra dira Promozio Txapelketako txapeldunak. Atzo, 40-39 nagusitu zitzaizkien Segurola eta Larrañagari finalean. Markagailuak erakusten duen bezala, oso lehia estua izan zen. Gutxigatik bazen ere, txapeldunak aurretik joan ziren partiduaren hiru laurdenean (5-4, 13-13, 18-11, 25-20, 30-25), baina azken zatian majo sufritu zuten txapela lortzeko. Segurola eta Larrañaga hiru tantoko aldea ateraz aurretik joan ziren: 33-36 eta 35-38. Baina azkenean, Urumea aldean geratu ziren txapelak.
Beteranoa eta berria
Zubiri txapelketako beteranoa zela esan liteke eta Ansa berriz, berrietako bat. Apirilean debutatu zuen profesionaletan, beste hiru gazterekin, eta dagoeneko lortu du bere lehenengo txapela. Zubirik bigarrena lortu du, denbora gutxian.