Koadrilen eguna, umorean eta lagunartean ondo pasatzeko eguna zen atzokoa, Muzki koadrilak brindisean esan bezala. Eta esandakoari zintzo obedituz, gogotik gozatu zuten herriko koadrilek, bakoitzak bere erara. Eguneko parranda egingo zuten batzuek eta goizaldera arte luzatzen den horietakoa beste batzuek, baina ziur oraindik festarako indar eta gogoa izango dutela askok, ostiral eta larunbata geratzen baitira aurretik.
Sokamuturra eta Axeri Dantza
Dianak esnatuko du eguna, Musika Eskolako dultzaineroekin. Eta etxeratu gabe dabiltzanentzat eta goiztiarrentzat, Sokamuturra eta Axeri Dantza izango dira.
Jubilatuen festa eta bertso jaialdia
Azpimarratzeko bi ekintza ere izango dira gaurkoan. Alde batetik, Goiz Eguzkiko kideek egun osoko festa antolatu dute. Eta bestetik, urteroko bertso jaialdia izango da arratsaldean, Gudarien Plazan.
Haur, gaztetxo eta gazteentzat, aukera zabala
Haur, gaztetxo eta gazteek ere izango dute zerekin gozatu. Haurrentzako jokoak eskainiko ditu Kulki taldeak goiz partean, Atsegindegin: Industriaren kirol parkea.
Erraldoi eta Buruhaundien konpartsak ere ez du hutsik egingo. Eguerdian aterako dira kaleak girotzera Kriskitiña dantza taldearekin eta Ostargi erraldoi konpartsarekin.
Horrez gain, 11-17 urteko gaztetxoentzat parke mundiala antolatu dute Gazte Txokoak eta Kale Hezitzaileek. Atsegindegin izango da, arratsalde partean.
Pottoka eta zezen txikietan ibiltzeko aukera ere izango dute txikienek, Latsunben.
Eta adin guztietako gazteentzat, egun osoko egitaraua antolatu dute Sutu Jaiak! ekimenaren barruan. Chill out gunea ere prestatu dute Ave Maria parkean.
Denetariko musika
Festetan osagai garrantzitsua izaten da musika eta gusto guztietarako eskaintza izango da: reggae gaua Molotoff irratiaren eszenatokian, Jaiki Hadi taldearen emanaldia Urbieta kalean, Rock kontzertua Tilosetan, txaranga...