Karmelo Labaka eraikinean, Hernani BHIko Lanbide Heziketako eskolan, festa egun polita ospatu zen astelehenean.
Lanbide Heziketak garai berrietara egokitzeko urrats haundiak eman ditu (eskaintza aldetik, metodologia berriak aplikatuz…) Lanbide Heziketako IV Euskal Planari jarraituz.
Aipatutako ildotik, ikasleek ikasturtean zehar landutako lan eta proiektu ezberdinen erakusketa egin zen: retrofitting teknikaren bitartez konpondutako makinak, chopper bizikletak, Lanbide Heziketako eskultura bat...
Ekitaldira, erakunde desberdinetako ordezkariak gonbidatu zituzten eta bertan izan ziren, hain zuzen, ikastetxearekin harremanak dituzten enpresa desberdinetako ordezkariak (Ibarkalde, Atinsa, Setalde, Telesonic, Telemar, Eralki…), erakunde desberdinetako ordezkariak (Daiteke, Beterri-Garapen Agentzia, Ikaslan…), udaletxeko ordezkariak, Delegaritzakoak eta baita ikasle eta irakasle ohiak ere.
Eskerrak emateko ekitaldia
Ekitaldi hau, aipatutako erakunde horiei eskerrak emateko aitzakia izan zela nabarmendu dute Hernani BHItik: «erakunde hauekin guztiekin edukitako harremana eskertzeko». Hori horrela, eskolako bi ikaslek aurreskua dantzatu zieten eta oroigarri bana eman zieten. Hamaiketakoa ere izan zuten eta animazio programaren barruan, musika zuzenean izan zuten, ikasleek eskainita.
«Lerro hauen bitartez, berriz, gure esker ona adierazi nahi diegu gurekin une hau konpartitu duten guztiei; baina benetan kontuan hartzekoa da ematen diguten konfiantza eta gure ikasleekin duten arreta. Mila esker!».